ފުރަމާލޭގައި ފަށާފައިވާ މިނީ ބަހުގެ ޚިދުމަތް މިހާރަށްވުރެ ފުޅާކުރައްވާނެކަމުގެ ޔަގީންކަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ދެއްވައިފިއެވެ. 

މާލޭގައި މިނީ ބަހުގެ ޚިދުމަތް ފެށުމާއި ގުޅިގެން ރައީސް ސޯލިހު ކުރެއްވި ޓްވީޓެއްގައި ވިދާޅުވީ ބަހުގެ ޚިދުމަތް ފެށުމަކީ ބައިބޯ މާލޭގައި ދިރިއުޅޭ ރައްޔިތުންނަށް ތަސައްލީއެއް ލިބިގެންދިޔަ ކަމެއްކަމަށެވެ. އަދި އެ ޚިދުމަތް އިތުރަށް ފުޅާކުރައްވާނެކަމަށް ރައީސް ސޯލިހު ވިދާޅުވިއެވެ. 

ރައީސް ސޯލިހު ސިފަކުރެއްވި ގޮތުގައި އާރުޓީއެލް މިނީ ބަހުގެ ޚިދުމަތް ފެށިގެން ދިއުމަކީ ވަށާޖެހޭ އާންމު ދަތުރުފަތުރުގެ ނިޒާމު ފުރިހަމަ ކުރުމަށް ލިބުނު ކުރިއެރުމެކެވެ. 

Advertisement

"ވަށައިޖެހޭ އާންމު ދަތުރުފަތުރުގެ ނިޒާމެއްގެ ތެރެއިން އާރުޓީއެލް މިނީ ބަހުގެ ހިދުމަތް ފެށިގެން ދިޔުމަކީ، މި ނިޒާމު ފުރިހަމަކުރުމުގައި ލިބުނު ކުރިއެރުމެއް ބައިބޯ މާލޭގައި ދިރިއުޅޭ ރައްޔިތުންނަށް ލިބޭ ތަސައްލީއަކަށް މިޚިދުމަތްވެ އިތުރަށް ތަރައްޤީވެގެންދާނެ" ރައީސް ސޯލިހުގެ ޓްވީޓުގައި ލިޔުއްވާފައިވެއެވެ. 

މިނީ ބަހުގެ ޚިދުމަތް އަލުން އަނބުރާ ފުރަމާލޭގައި ފަށާފައިވަނީ 11 އަހަރުގެ މެދުކެނޑުމަކަށް ފަހުގައެވެ. 

މިނީ ބަހުގެ ޚިދުމަތް ދޭން ފެށުމަކީ މި ސަރުކާރުގެ 100 ދުވަހުގެ ވައުދެކެވެ. އެކި ސަބަބުތަކާހުރެ މި ޚިދުމަތް ފެށުން ލަސްވެގެން ދިޔަނަމަވެސް، އަލުން އަނބުރާ އެ ޚިދުމަތް ފެށިގެން ދިއުމަކީ ރައްޔިތުންނަށް އެތައް ގޮތަކުން ލުއި ފަސޭހަކަން ލިބިގެންދާނެ ކަމެއްކަމަށް ސަރުކާރުން ވަނީ ބުނެފައެވެ. 

މިނީ ބަހުގެ ޚިދުމަތް އެންމެ ފުރަތަމަ ދެ ހަފްތާގައި ހިލޭ ދިނުމަށް ސަރުކާރުން ވަނީ ނިންމާފައެވެ. އަދި މި މުއްދަތުގައި ވީހާވެސް ގިނައިން އެ ޚިދުމަތް ހޯދާ، ޚިދުމަތަށް އަހުލުވެރިވުމަށްވެސް ސަރުކާރުން ވަނީ އިލްތިމާސްކޮށްފައެވެ.