މިފްކޯއިން މިދިޔަ ސެޕްޓެމްބަރު މަހު ގަތް މަހުގެ މިންވަރާއި މަސްވެރިންނަށް ދެއްކި ފައިސާ އޭގެ ކުރީ މަހާ އަޅައިބަލާއިރު މަދުވެފައިވާކަން އެ ކުންފުނީގެ ތަފާސްހިސާބުތަކުން ހާމަވެއްޖެއެވެ.

މިފްކޯގެ ހިސާބުތައް ދައްކާ ގޮތުން ސެޕްޓެމްބަރު މަހު 451 ދޯންޏަކުން ޖުމުލަ 1288.42 ޓަނުގެ މަސް ކިރުވައިފައިވެއެވެ. އޭގެ ތެރޭގައި ހިމެނެނީ 1284.1 ޓަނުގެ ކަޅުބިލަމަހާއި 10 ކިލޯއިން މަތީ ކަންނެލީގެ 0.5 ޓަނާއި 15 ކިލޯއިން މަތީ ކަންނެލީގެ 3.8 ޓަނެވެ. އެ މަހު މަސްވެރިންނަށް ދޫކޮށްފައިވަނީ 27.32 މިލިއަން ރުފިޔާއެވެ.

ނަމަވެސް, އޮގަސްޓު މަހު 535 ދޯންޏަކުން 1488.30 ޓަނު ކިރުވައި 29.99 މިލިއަން ރުފިޔާ ދޫކޮށްފައިވާތީ ސެޕްޓެމްބަރު މަހާ ދެމެދު 2.67 މިލިއަން ރުފިޔާގެ ފަރަގެއް ފާހަގަކުރެވެއެވެ.

ކަޅުބިލަމަހުގެ އަގަށް ބަލާއިރު އޮގަސްޓު މަސް ނިމުނު އިރު ކިލޯއެއް ގަންނަ އަގު 21 ރުފިޔާއަށް ބޮޑުކޮށްފައިވީ ނަމަވެސް ސެޕްޓެމްބަރު ނިމެން ވާއިރަށް އެ އަގު ވަނީ 22 ރުފިޔާއަށް އުފުލައިފައެވެ. އެ ދެ މަހު ވެސް 10 ކިލޯއާއި 15 ކިލޯއާ ދެމެދުގެ ބޮޑުކަންނެލި ކިލޯއެއްގެ އަގު 20 ރުފިޔާގައި 15 ކިލޯއިން މަތީ ބޮޑުކަންނެލީގެ އަގު 25 ރުފިޔާގައި ހިފެހެއްޓިފައިވެއެވެ.

މި އަހަރުގެ ތެރޭގައި އެންމެ ރަނގަޅު ނަތީޖާއެއް ފެނުނީ އެޕްރީލް މަހުންނެވެ. އެ މަހު 4.41 ޓަނުގެ މަސް ކިރުވައި 78.78 މިލިއަން ރުފިޔާ މަސްވެރިންނަށް ދޫކޮށްފައިވެއެވެ.

އެއާ ޚިލާފަށް މި އަހަރު އެންމެ ދަށްކޮށް ދިޔައީ ޖޫން މަހެވެ. އެ މަހު ކިރުވީ 568 ޓަނުގެ މަހެވެ. މަސްވެރިންނަށް ލިބުނީ 11.33 މިލިއަން ރުފިޔާއެވެ.