ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ މެންބަރުކަމުގެ މަޤާމަށް ހ. މީނާޒް ޝަމްޢޫން ޙަމީދު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ޢައްޔަންކުރައްވައިފިއެވެ.

ރައީސުލްޖުމްހޫރިއްޔާގެ އޮފީހުގައި ހެނދުނު ބޭއްވެވި ޚާއްޞަ ރަސްމިއްޔާތެއްގައި ސުޕްރީމް ކޯޓުގެ ފަނޑިޔާރު ޑޮކްޓަރު މުޙައްމަދު އިބްރާހީމް، ޝަމްޢޫން ޙަމީދަށް މެންބަރުކަމުގެ ހުވާ ލައިދެއްވި އިރު އެ ރަސްމިއްޔާތުގައި މަޤާމަށް ޢައްޔަންކުރެއްވި ކަމުގެ ލިޔުން ރައީސުލްޖުމްހޫރިއްޔާ ވަނީ ޝަމްޢޫން ޙަމީދާ ހަވާލުކުރައްވައިފައެވެ.

ޝަމްޢޫން ޙަމީދަކީ އެޗްއާރުސީއެމްގައި ކުރިންވެސް ގިނަ ޒިންމާތަކެއް އަދާކުރައްވައިފައިވާ ބޭފުޅެކެވެ. 2010 އިން 2012 އަށް އެ ކޮމިޝަނުގެ އިންވެސްޓިގޭޝަން ޑިޕާޓްމަންޓުގެ ޑިރެކްޓަރުކަން ކުރެއްވުމަށް ފަހު 2012 އިން 2016 އަށް ސެކްރެޓަރީ ޖެނެރަލްގެ މަޤާމުގައި ހުންނެވީ ވެސް ޝަމްޢޫން ޙަމީދެވެ.

އެ މުއްދަތުގައި ޔުނިވާސަލް ޕީރިއަޑިކް ރިވިއު (ޔޫ.ޕީ.އާރް) ރިޕޯޓު ކުރުމުގައި ކޮމިޝަނުގެ ފޯކަލް ޕޮއިންޓެއްގެ ދައުރު އަދާކުރެއްވުމުގެ އިތުރުން ނުކުޅެދުންތެރިކަން ހުންނަ ކުދިންގެ ތަޢުލީމީ ފުރުޞަތުތަކާއި ކުޑަކުދިންގެ ޙައްޤުތައް ރައްކާތެރިކުރުމާ ގުޅޭ ޤައުމީ ފެންވަރުގެ ދިރާސާތަކުގައި ވެސް މުހިންމު ދައުރެއް އަދާކުރެއްވިއެވެ.

ޝަމްޢޫން ޙަމީދު އެޗްއާރުސީއެމްގެ މެންބަރުކަމަށް ޢައްޔަންކުރެއްވުމާ ހަމައަށް ހުންނެވީ މިނިސްޓްރީ އޮފް ދިވެހި ލެންގުއޭޖް ކަލްޗަރ އެންޑް ހެރިޓޭޖްގެ ޕާމަނެންޓް ސެކްރެޓަރީގެ މަޤާމުގައެވެ.