ޗެކްރިޕަބްލިކް ބަލިކޮށް ސްޕެއިނުން ބަލިނުވެ 41 މެޗް ހަމަކޮށްފިއެވެ.
ޔުއެފާ ނޭޝަންސް ލީގްގައި ރޭ ޗެކްރިޕަބްލިކް އަތުން މޮޅުވެ، ސްޕެއިނުން ވަނީ އެޓީމް ބަލިނުވެ އަންނަ އައުމުގެ ސިލްސިލާ ދަމަހައްޓާފައެވެ. ސްޕެއިނުގައި ޗެކްރިޕަބްލިކާ ދެކޮޅަށް ކުޅުނު މެޗުން އެޓީމް މޮޅުވީ 1-3 ގެ ނަތިޖާއިންނެވެ.
ސްޕެއިނަށް ގޯލް ހުޅުވާލަދިނީ މެޗް ފަށައިގެން ހަވަނަ މިނެޓުގައި ލަމީން ޔަމާލް އެވެ. އޭނާ މި ލަނޑު ކާމިޔާބުކުރީ އޭރިއާގެ އަރިމަތިން އެތެރެއަށް ވަދެ، ގޯލުގެ ކަނަށް ބޯޅަ ފޮނުވާލައިގެންނެވެ. ސްޕެއިނުން މެޗުގެ ކޮންޓްރޯލް ދަމަހައްޓަމުން ދަނިކޮށް، 35 ވަނަ މިނެޓުގައި ރޮޑްރީ ވަނީ އެޓީމުގެ ދެވަނަ ލަނޑު ކާމިޔާބުކޮށްދީފައެވެ.
ދެވަނަ ހާފަށް ނުކުމެ ޗެކް ރިޕަބްލިކުން ވަނީ އެޓީމުގެ ކުޅުން ރަނގަޅުކޮށްފައެވެ. ނަތީޖާއެއްގެ ގޮތުން، އާދަމް ހްލޯޒެކް ތަނަވަސްކޮށްދިން ފުރުސަތަކުން ޖީރީ ސްލާމާ ވަނީ ލަނޑެއް ޖަހައި ފަރަގު ކުޑަކޮށްފައެވެ. އޭގެ 20 މިނެޓް ފަހުން ރަޔަން ނަދޭރީ ލަނޑެއް ޖެހިނަމަވެސް، ފައުލްކޮސްފައިވާތީ ރެފްރީ ނިންމީ އެއީ ގޯލެއް ނޫންކަމަށެވެ.
ޗެކް ރިޕަބްލިކަށް އިތުރު ދަތިތަކާ ކުރިމަތިވީ އެޓީމުގެ ލަޑިސްލާވް ކްރެޖްޗީއަށް ދެވަނަ ރީނދޫ ކާޑާއެކު ރަތް ކާޑު ދެއްކުމުންނެވެ. ޗެކް ރިޕަބްލިކުން އެކަކު މަދުކޮށް ކުޅެމުންދަނިކޮށް އެކަމުގެ ފައިދާ ނަގައި ސްޕެއިނުން ވަނީ ތިންވަނަ ލަނޑު ޖަހާފައެވެ. މި ލަނޑު ކާމިޔާބުކޮށްދިނީ، މިކޭލް މެރީނޯ އެވެ.
Advertisement
This content is created and paid for by advertisers and does not involve Voice Journalists
