މިއަދުގެ މުޖުތަމަޢުގައި ސޯޝަލް މީޑިއާ ހުޅުވާލުމާއެކު ފެންނަނީ ހަށިގަނޑުން ސަރުބީ ނައްތާލައި، މަސްތައް ރީތިކޮށް އެނގޭނޭހެން "ޝްރެޑް" ވެފައިވާ ހަށިގަނޑެއް ހޯދުމަށް މަސައްކަތްކުރާ މަންޒަރެވެ. ޑައިޓް ކަލްޗަރާއި ލޯ-ފެޓް ކާނާތަކުގެ ސަބަބުން، ސަރުބީއަކީ އެއްކޮށް ނައްތާލަންޖެހޭ އެއްޗެއްގެ ގޮތުގައި ވަނީ ދެކެވިފައެވެ. އަދި ބަރުދަން ލުއިކުރާ ބޭސްތަކުގެ ސަބަބުން ބޮޑުތަކުން ހަށިގަނޑު ހިއްކާލުމުގެ ޓްރެންޑް އަނެއްކާވެސް މިވަނީ އާލާވާން ފަށާފައެވެ.

ނަމަވެސް، ސިއްޙީ މާހިރުން ބުނާ ގޮތުގައި ސަރުބީއަކީ އަޅުގަނޑުމެން ހީކުރާހާ "ނުބައި" އެއްޗެއް ނޫނެވެ. މާގިނައިން ހުރުމެކޭ އެއްފަދައިން، ހަށިގަނޑުގައި ސަރުބީ މާބޮޑަށް މަދުވުމަކީވެސް ފުރާނައަށް ނުރައްކާވާ ފަދަ ގެއްލުންތަކެއް ހުރި ކަމެކެވެ. މެޑިސިން ޕްރޮފެސަރ އެލިފް އޯރަލް ވިދާޅުވާ ފަދައިން، އަޅުގަނޑުމެންގެ ހަށިގަނޑުގެ ސަރުބީއަކީ ވަރަށް މުހިންމު ބަޔޮލޮޖިކަލް ދައުރެއް އަދާކުރާ އެއްޗެކެވެ.

އާންމު ގޮތެއްގައި ސަރުބީ ދެބަޔަކަށް ބެހެއެވެ. އެއީ ކާނާއިން ލިބޭ ސަރުބީ (ޑައިޓަރީ ފެޓް) އަދި ހަށިގަނޑުގައި ރައްކާކުރެވޭ ސަރުބީ (ބޮޑީ ފެޓް) އެވެ. އަޅުގަނޑުމެން ކާ ކާނާއިން ބޭނުންކޮށް އިތުރުވާ ކެލޮރީތައް ހަށިގަނޑުގެ ސެލްތަކުގައި (އެޑިޕޯސައިޓްސް) ރައްކާކުރެއެވެ. މިއީ ހަމައެކަނި ހަރަކާތެއްނެތި ހުންނަ އެއްޗެއް ނޫނެވެ؛ ސަރުބީއަކީ ހަށިގަނޑުގެ އެކި މަސައްކަތްތައް ހިންގާ އެއްޗެކެވެ. 

ހަކަތަ ރައްކާކުރުން: ކާނާ މަދުވާ ހާލަތްތަކުގައި ހަށިގަނޑަށް ބޭނުންވާ ހަކަތަ ފޯރުކޮށްދޭ ޚަޒާނާއަކީ ސަރުބީއެވެ.

ހޯމޯން އުފެއްދުމާއި މުވާސަލާތު: ސަރުބީ ސެލްތަކުން 'ލެޕްޓިން' ފަދަ މުހިންމު ހޯމޯންތައް އުފައްދައެވެ. މި ހޯމޯން ސިކުނޑިއަށް މެސެޖު ފޮނުވަނީ ހަށިގަނޑުގައި އެކަށީގެންވާ ވަރަށް ހަކަތަ އެބަހުރިކަމަށެވެ. މީގެ ސަބަބުން ދަރިމައިވުމާއި، ބަލިތަކާ ދެކޮޅަށް މަސައްކަތްކުރުން ފަދަ މުހިންމު ކަންކަމަށް ހަށިގަނޑު ސަމާލުކަން ދެއެވެ.

ހަށިގަނޑު ހޫނުކޮށް ބެހެއްޓުން: ބައެއް ވައްތަރުގެ ސަރުބީން ހަށިގަނޑު ފިނީގެ އަސަރުން ރައްކާތެރިކޮށްދޭއިރު، އަނެއްބައި ވައްތަރު ސަރުބީ އަނދައިގެން ހަށިގަނޑަށް ބޭނުންވާ ހޫނުކަން އުފައްދައިދެއެވެ.

ހަށިގަނޑުގައި ސަރުބީ މާބޮޑަށް މަދުވެއްޖެނަމަ، ހަށިގަނޑު 'ސްޓާވޭޝަން މޯޑް' ނުވަތަ ބަނޑުހައިހޫނުކަމުގެ ހާލަތަކަށް ގޮސް ދިފާޢީ ނިޒާމު ބަލިކަށިވެއެވެ. އަދި ހަކަތަ ހޯދުމަށްޓަކައި ހަށިގަނޑުގައި ހުންނަ މަސްތައް ވިރުވަން ފަށައެވެ. ކަށިތައް ބަލިކަށިވެ، ބިނދުމުގެ ފުރުޞަތު ބޮޑުވެއެވެ. ފިރިހެނުންގެ ޓެސްޓޮސްޓަރޯން ދަށްވެ، ވަރުބަލިކަން އިހުސާސްވާއިރު، އަންހެނުންގެ މައްސަރު ކަންތަކަށް ބުރޫއަރައި ނުވަތަ އެއްކޮށް ހުއްޓޭގޮތް ވެއެވެ. އުމުރުން ދުވަސްވީ މީހުން ބޮޑެތި ބަލިތަކުގައި އުޅޭއިރު، ކޮންމެވެސް ވަރަކަށް ސަރުބީ ހުރުމަކީ ފުރާނަ ސަލާމަތްވުމުގެ ފުރުޞަތު ބޮޑުކޮށްދޭ ކަމެއް ކަމަށް ދިރާސާތަކުން ދައްކައެވެ.

އާންމު ގޮތެއްގައި ދުޅަހެޔޮ ފިރިހެނެއްގެ ހަށިގަނޑުގައި 10% އާއި 20% އާ ދެމެދުގެ ސަރުބީ ހުންނަންވާނެއެވެ. އަދި ދުޅަހެޔޮ އަންހެނެއްގެ ހަށިގަނޑުގައި 20% އާއި 29% އާ ދެމެދުގައެވެ. އެތުލީޓުންގެ މި އަދަދު ދަށްވި ނަމަވެސް، ޞިއްޙަތަށް ރަނގަޅު މިންވަރަކީ މީހާގެ ޖިންސާއި ނަސްލަށް ބަލައި ތަފާތުވާ އެއްޗެކެވެ.

ސަރުބީ ހުންނަ ތަނަކީވެސް މުހިންމު ކަމެކެވެ. ބަނޑުތެރޭގެ ގުނަވަންތަކުގެ ވަށައިގެން ޖަމާވާ 'ވިސެރަލް ފެޓް' ގިނަވުމަކީ ލޭގެ ޕްރެޝަރު މަތިވެ، ހަކުރުބަލި ޖެހުމަށް މަގުފަހިވާ ކަމެކެވެ.

ހަށިގަނޑުގެ ސަރުބީ ބެލުމަށް ޑެކްސާ ސްކޭން، ސްކިންފޯލްޑް ޓެސްޓް، އަދި ސްމާޓް ކިރާ ތިލަފަތް ބޭނުންކުރި ނަމަވެސް ގޭގައި ފަސޭހައިން ބެލެން ހުރެއެވެ. އެންމެ ފަސޭހަ އަދި އިތުބާރުހުރި ދެ މިންގަނޑަކީ:

އިސްކޮޅާއި އުނަގަނޑުގެ ރޭޝިއޯ (Waist-to-height ratio): މި ނިސްބަތް 0.4 އާއި 0.49 އާ ދެމެދު ހުރުން ރަނގަޅެވެ.

އުނަގަނޑާއި އުކުޅުވަޅުގެ ރޭޝިއޯ (Waist-to-hip ratio): މިއީ ފިރިހެނުންގެ 0.90 އަށްވުރެ އަދި އަންހެނުންގެ 0.85 އަށްވުރެ ދަށުގައި ހުންނަންޖެހޭ އެއްޗެކެވެ.

އުމުރުން ދުވަސްވަމުންދާ ވަރަކަށް ކަށިތަކާއި މަސްތައް ވަރުގަދަކޮށް ބެހެއްޓުމަށް ރަނގަޅު ކާނާ ކެއުމާއި ކަސްރަތު ކުރުމަކީ މުހިންމު ކަމެކެވެ. ހަށިގަނޑުގައި ހުންނަ ހުރިހާ ސަރުބީއެއް ނައްތާލުމަކީ ދުޅަހެޔޮ ސިއްޙަތެއްގެ ނިޝާނެއް ނޫނެވެ. މުހިންމީ މާބޮޑަށް ހިކިވާން މަސައްކަތް ކުރުމުގެ ބަދަލުގައި، ހަށިގަނޑަށް ބޭނުންވާ މިންވަރަށް ސަރުބީ ބެހެއްޓުމެވެ. އަޅުގަނޑުމެންގެ ފުރާނައާއި ޞިއްޙަތު ރައްކާތެރިކޮށްދިނުމުގައި ސަރުބީ އަދާކުރާ އަގުހުރި ދައުރު ދަނެގަނެ، އެއީ ބާރުގަދަ އަދި އެހާމެ މުހިންމު އެއްޗެއްގެ ގޮތުގައި ބަލައިގަންނަން ދަސްކުރަންޖެހެއެވެ.