ޑެސްޓިނޭޝަން ޕްރިންސިޕަލްގެ އުސޫލުން، ޓީޖީއެސްޓީގެ ޤާނޫނަށް ވަރަށް އަވަހަށް އިޞްލާޙުތަކެއް ގެނައުމަށް ނިންމަވާފައިވާކަމަށް ފަތުރުވެރިކަމާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.

ޤައުމީ ފަތުރުވެރިކަމުގެ ދުވަހުގެ ޖަލްސާގައި ވާހަކަދައްކަވަމުން ފަތުރުވެރިކަމާ ބެހޭ ވަޒީރު އަމީން ވިދާޅުވީ، ވޭތުވެދިޔަ ދެ މަސްދުވަހުގެ ތެރޭގައި ޤާނޫނަށް ގެނެވުނު ބަދަލުތަކާ ގުޅިގެން ފަތުރުވެރިކަމުގެ ސިނާޢަތުގެ ވިޔަފާރިވެރިންނާއި، ޓްރެވަލް އެޖެންޓުންގެ ގިނަ ކަންބޮޑުވުންތަކެއް ހުރިކަން ސަރުކާރަށް ފާހަގަކުރެވިފައިވާ ކަމަށެވެ. ޚާއްޞަކޮށް ޑެސްޓިނޭޝަން ޕްރިންސިޕަލްގެ އުޞޫލުން ޓީޖީއެސްޓީ ދެއްކުމުގައި ދެވިފައިވާ މުއްދަތުތަކާއި އެހެނިހެން ކަންކަމާ ގުޅޭގޮތުން މި ދާއިރާގެ އިސް ފަރާތްތަކުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ކަންބޮޑުވުންތައް ހިއްސާކޮށް، ގިނަ ހުށަހެޅުންތަކެއް ހުށަހަޅާފައިވާ ކަމަށް ވަޒީރު ވިދާޅުވިއެވެ.

އެހެންކަމުން، ސިނާޢަތުގައި ހަރަކާތްތެރިވާ ފަރާތްތަކުގެ ކަންބޮޑުވުންތަކަށް ރިޢާޔަތްކުރެއްވުމަށްފަހު، ރައީސުލްޖުމްހޫރިއްޔާގެ ނިންމެވުމާ އެއްގޮތަށް ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ޤާނޫނަށް ވަރަށް އަވަހަށް އިޞްލާޙީ ބަދަލުތަކެއް ގެނައުމަށް ހަމަޖެހިފައިވާ ކަމަށް ވަޒީރު ވިދާޅުވިއެވެ.

މި ޖަލްސާގައި ވަޒީރު ވަނީ ދުނިޔޭގެ މަޝްރަޙަށް އަންނަ ބަދަލުތަކުގެ ސަބަބުން ރާއްޖޭގެ ފަތުރުވެރިކަމަށް ކުރިމަތިވާ ގޮންޖެހުންތަކުގެ މައްޗަށްވެސް ވަޒީރު އަލިއަޅުއްވާލެއްވިއެވެ. އެގޮތުން، މިއަހަރު ފެށިގެން ދިޔައީ އުންމީދީ އަހަރެއްގެ ގޮތުގައި ނަމަވެސް، މެދުއިރުމަތީގެ ހަނގުރާމައާއި ބައިނަލްއަޤުވާމީ ދަތުރުފަތުރަށް ކުރިމަތިވި ހުރަސްތަކުގެ ނޭދެވޭ އަސަރު ސިނާޢަތަށް ފޯރިކަން ފާހަގަކުރެއްވިއެވެ.

ނަމަވެސް، މި ހުރިހާ ގޮންޖެހުންތަކާ އެކުވެސް ރާއްޖޭގެ ފަތުރުވެރިކަމުގެ ދާއިރާގެ ވިލުންތެރިކަމާއި، ސިނާޢަތުގެ ބައިވެރިންނާއި ސަރުކާރު ގުޅިގެން ކުރި މަސައްކަތުން ދާއިރާ ކުރިއަރަމުން އަންނަކަން ވަޒީރު ފާހަގަކުރެއްވިއެވެ. މިގޮތުން، ވޭތުވެދިޔަ އަހަރުގެ އޯގަސްޓް މަހާ އަޅާބަލާއިރު މިއަހަރުގެ އޯގަސްޓް މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވެފައިވާ ކަމަށާއި، ފަތުރުވެރިން އަންނަ މިންވަރު ކުރީގެ ރަނގަޅު ޙާލަތަށް ވާސިލްވަމުންދާ ކަމަށްވެސް ފަތުރުވެރިކަމާ ބެހޭ ވަޒީރު ވިދާޅުވިއެވެ.