ދިރިއުޅުމުގައި މަޖަލަކަށް ނުވަތަ ފަސޭހައިން ފައިސާ ހޯދުމުގެ ބޭނުމުގައި ކުރެވޭ ބައެއް ކަންކަމަކީ މުޅި އުމުރަށް އޭގެ ހިތި އުފުލަންޖެހޭ ފަދަ ނުރައްކާތެރި ކަންކަމެވެ. އެގޮތުން، މިފަހަކަށް އައިސް އަޅުގަނޑުމެންގެ މުޖުތަމަޢުގައި އާންމުވަމުންދާ ޖުވާކުޅުން (ގޭމްބްލިންގް) ގެ ސަބަބުން ދިރިއުޅުން އެފުށްމިފުށަށް ޖެހި، ހުރިހާ އުފަލަކުން މަހްރޫމްވި ދިވެހި ޒުވާނަކު މިވަނީ އޭނާގެ ހިތްދަތި ވާހަކަތައް މުޅި މުޖުތަމަޢާ ހިއްސާކޮށްފައެވެ. އޭނާގެ މަޤްޞަދަކީ ކުށުގެ ބަދަލު ދިނުމާއި، އޭނާގެ ތަޖުރިބާއިން އެހެން ޒުވާނުންނަށް ޢިބުރަތެއް ހޯދައިދިނުމެވެ.

ހިތާމައާއި ލަދުވެތިކަމުން ފުރިގެންވާ ހާލުގައި އެ ޒުވާނާ ހާމަކުރި ގޮތުގައި، އެއްއިރަކު އޭނާއަކީ ވެސް އުފާވެރި، ހަމަޖެހޭ އަދި އުންމީދުން ފުރިގެންވި ދިރިއުޅުމެއް އުޅެމުންދިޔަ މީހެކެވެ. ނަމަވެސް، ޝައިޠާނާގެ ވަސްވާހުގައި ޖެހި، ޖުވާކުޅުމުގެ ނުބައި ވަބާގައި އެންމެ ފުރަތަމަ ޖެހުނީ މަޖަލަކަށެވެ. އެހެންނަމަވެސް، ވަގުތު ފާއިތުވަމުން ދިޔަވަރަކަށް މުޅި ދިރިއުޅުން އެ އަނދިރި އަނދަވަޅުގެ ތެރެއަށް ގެނބި، ވިސްނުމާއި ސިކުނޑި ހަލާކުވެ، އިންތިހާ ދަރަޖައިގެ ޑިޕްރެޝަނަކަށް ވެއްޓި އަމިއްލަ ނަފްސުގެ މައްޗަށް އޮތް ބާރު ކެނޑިގެން ދިޔައެވެ.

މި ނުބައި ޢަމަލުގެ ސަބަބުން އޭނާގެ ކައިވެނި ރޫޅި، އިތުބާރުކުރި އެންމެހައި އެކުވެރިންނާއި ހެޔޮއެދޭ މީހުން ގެއްލި މުޅިން އެކަނިވެރިވިއެވެ. ޖުވާ ކުޅެގެން އެތައް މިލިއަން ރުފިޔާއެއް ލިބުނު ނަމަވެސް، އެއަށްވުރެ އެތައް ގުނައެއް އިތުރަށް ގެއްލި، މުޅިން ބަނގުރޫޓުވެ، އެތައް ބަޔަކަށް ބޮޑެތި ޢަދަދުތަކުން ދަރަނިވެރިވާން ޖެހުނެވެ. އެކަކު އަތުން ލޯނު ނަގައިގެން އަނެކަކަށް ދައްކަމުން ދިޔައިރު، ދޮގާއި މަކަރުގެ ދަލެއްގައި އޭނާ ތާށިވެގެން ދިޔައެވެ.

މިއަދު އޭނާގެ ހާލަތަކީ، ދަރަނީގެ ސަބަބުން އަންނަ އިންޒާރުތަކާއި ބިރުވެރިކަމާ ހުރެ ކޮޓަރިން ބޭރަށް ނިކުންނަން ވެސް ނުކެރި، ބިރުވެރިކަމެއްގެ ތެރޭގައި ދުވަސްތައް ގުނުމެވެ. ވަޒީފާއަކަށް ދިޔަނަމަވެސް، އެތަނަށް މީހުން ގުޅައި ބިރުދައްކާތީ ހަމަޖެހިގެން މަސައްކަތެއް ކުރެވޭނެ މާޙައުލެއް ވެސް މިއަދު އޭނާއަކަށް ނެތެވެ.

މި ހުރިހާ ކަމެއްގެ ޒިންމާ ފުރިހަމައަށް އަމިއްލަ ބޮލުގައި އަޅައި، އޭނާގެ ސަބަބުން މާލީ އަދި ނަފްސާނީ ގޮތުން އަނިޔާ ލިބުނު ހުރިހާ ފަރާތްތަކުގެ ކިބައިން އޭނާ ވަނީ އިޚްލާޞްތެރިކަމާއެކު މަޢާފަށް އެދިފައެވެ. އަދި ބިރުން ފޯނު ނުނަގައި، ފިލައިގެން އުޅެވުނު ކަމަށްޓަކައި ލަދުވެތިވާކަން ހާމަކުރަމުން، الله ގަންދީ ވަޢުދުވީ ކިތަންމެ ދަތި ޙާލުގައި ނަމަވެސް، މަސައްކަތް ކޮށްގެން ހުރިހާ ދަރަންޏެއް އަނބުރާ ދައްކައި ޚަލާޞްކުރާނެ ކަމަށެވެ. އެކަމަށްޓަކައި އޭނާ އެދެނީ އެ ފުރުޞަތާއި ވަގުތު ދިނުމަށެވެ.

ޒުވާނާގެ މި ވާހަކަ ނިންމާލަމުން އޭނާ ވަނީ މުޅި މުޖުތަމަޢަށް، ޚާއްޞަކޮށް ޒުވާނުންނަށް ވަރުގަދަ ނަޞޭޙަތެއް ދީފައެވެ.

"ގޭމްބްލިންގް ނުވަތަ ޖުވާކުޅުމަކީ މީހާގެ ދުނިޔެއާއި އާޚިރަތް ހަލާކުކޮށްލާ ބޮޑު ވަބާއެކެވެ. އެއީ އުފަލެއް ނޫނެވެ؛ އެއީ މުޅި ދިރިއުޅުން އަނދާ އަޅިއަށް ހަދާލާ ވިހައެކެވެ. އެއްވެސް އަޚަކު ނުވަތަ އުޚުތަކު މި ނުބައި މަގަށް ފިޔަވަޅު ނޭޅުމަށް އަޅުގަނޑުގެ ހިތުގެ އަޑިން އެދެމެވެ." ޒުވާނާ ލިޔެފައިވެއެވެ.

ފާފަތަކަށް ތައުބާވެ، ރަނގަޅު މީހެއްގެ ގޮތުގައި މުޖުތަމަޢަށް އެނބުރި އައުމަށް އޭނާ ކުރާ މަސައްކަތުގައި އެންމެހައި ފަރާތްތަކުގެ މަޢާފާއި ހެޔޮދުޢާއަށް އޭނާ ވަނީ އާދޭހާއެކު އެދިފައެވެ.

ގޭމްބްލިންގ, ނޫނީ ބެޓްކުރުން ނުވަތަ އެނޫންވެސް ނަންނަމުގައި ޖުވާގެ ނުރައްކާތެރި ވަބާ އަދުގެ ޒުވާނުންގެ މެދުގައިވެސް އާއްމުވެފައިވާއިރު، ދީނީ ޢިލްމުވެރިންވެސް އަންނަނީ އެފަދަ ކަންކަމަކީ އިސްލާމްދީން ހުއްދަކުރާ ކަންކަމެއްނޫން ކަން ހާމަކުރައްވައި އެކަމުން ދުރުވެ ތިބުމަށް ތަކުރާރުކޮށް ނަޞޭޙަތްތެރިވަމުންނެވެ.