މިދިޔަ އަހަރާ އަޅާބަލާއިރު މިއަހަރުގެ މިހާތަނަށް ދައުލަތަށް އާމްދަނީ ލިބޭ އެކިއެކި ދައިރާތަކުގެ ކުރިއެރުން ރަނގަޅުވެފައިވާކަމަށް މާލީ ވުޒާރާއިން ބުނެފިއެވެ.

ދައުލަތުގެ ހަރަދުބަރަދު ހުރިނެތްގޮތާ ގުޅޭގޮތުން މާލީ ވުޒާރާއިން އެންމެފަހުން ނެރުނު "ވީކްލީ ފިސްކަލް ޑިވަލޮޕްމަންޓްސް ރިޕޯޓް" ގައިވާ ގޮތުން، އަހަރުގެ މިހާތަނަށް އާމްދަނީ އާއި ހިލޭ އެހީގެ ގޮތުގައި ޖުމްލަ 30.205 ބިލިއަން ރުފިޔާ ވަނީ ލިބިފައެވެ. މިއީ 2023 ވަނަ އަހަރުގެ އެ މުއްދަތުގައި ލިބުނު 28.750 ބިލިއަން ރުފިޔާއާ އަޅާބަލާއިރު 5.1 އިންސައްތައިގެ ކުރިއެރުމެކެވެ.

ރިޕޯޓުގައިވާ ގޮތުން، ދައުލަތަށް ލިބޭ އާމްދަނީގެ މައިގަނޑު ދާއިރާއަކަށްވާ ޓެކުހުގެ ގޮތުގައި ލިބުނު އާމްދަނީ ވަނީ 21.366 ބިލިއަން ރުފިޔާއިން 23.388 ބިލިއަން ރުފިޔާއަށް އިތުރުވެ، 9.5 އިންސައްތައިގެ ކުރިއެރުމެއް ހޯދާފައެވެ.

- އިމްޕޯޓް ޑިއުޓީ: 13.1 އިންސައްތަ އިތުރުވެ 2.484 ބިލިއަން ރުފިޔާ 

- ވިޔަފާރި އާއި މުދަލުގެ ޓެކްސް: ލިބުނު އާމްދަނީ %21.4 އިތުރުވެ 5.8 ބިލިއަން ރުފިޔާގައި

- ޓީޖީއެސްޓީ: %10.8 އިތުރުވެ 4.05 ބިލިއަން ރުފިޔާގައި

- އެއާޕޯޓް ސާވިސް ޗާޖާއި ޑިޕާޗާ ޓެކްސް: ލިބުނު އާމްދަނީ %8.8 އިތުރުވެ 1.4 ބިލިއަން ރުފިޔާގައި

- މުދަލުން ލިބޭ އާމްދަނީ: %25.3 އިތުރުވެ 1.85 ބިލިއަން ރުފިޔާގައި

- ހިލޭ އެހީ: ލިބުނު މިންވަރު ދެގުނައަށްވުރެ އިތުރުވެ 0.237 ބިލިއަން ރުފިޔާއިން 0.496 ބިލިއަން ރުފިޔާއަށް

ފިނޭންސް މިނިސްޓްރީން ބުނެފައިވާ ގޮތުގައި ރާއްޖޭގެ ފަތުރުވެރިކަމުގެ ސީޒަން ކުރިއަށް އޮތުމާއެކު، މިއަހަރުގެ ކުރިއަށް އޮތް ދުވަސްތަކުގައި ފަތުރުވެރިކަމުގެ ސިނާއަތުންނާއި އެ ދައިރާ އާ ގުޅުންހުރި ދައިރާތަކުން ދައުލަތަށް ލިބޭ އާމްދަނީ އިތުރުވާނެ ކަމަށް ވަނީ ބެލެވިފައެވެ. މި ކުރިއެރުންތަކުން ދައުލަތުގެ މާލީ ހާލަތު ވަރުގަދަވެ، އިގްތިސާދީ ކުރިއެރުންތަކަށް އެހީތެރިވެގެންދާނެ ކަމަށް ކަމާބެހޭ އިދާރާތަކުން ވަނީ ލަފާކޮށްފައެވެ.