ޕްރިމިއާ ލީގުގެ ޑިސިޕްލިނަރީ މައްސަލައިގައި ލީގު ކޮމިޝަނުން ނެރުނު ރައުޔާ މެދު ހިތްހަމަނުޖެހި، މެންޗެސްޓާ ސިޓީ ފުޓުބޯޅަ ކްލަބުން އެ ނިންމުމާ ދެކޮޅަށް އިސްތިއުނާފު ކޮށްފިއެވެ.

މިކަމާ ގުޅޭގޮތުން މެންޗެސްޓަރ ސިޓީން ބުނެފައިވަނީ ކޮމިޝަނުގެ ރައުޔުގައި ޤާނޫނީ ގޮތުންނާއި އުސޫލީ ގޮތުންނާއި ހެކީގެ ގޮތުން ބޮޑެތި ގޯސްތައް ހުރި ކަމަށް ސިޓީން ޤަބޫލުކުރާ ކަމަށެވެ. ޕްރިމިއާ ލީގުން ކުރި ތުހުމަތުތަކާ ގުޅޭ ގޮތުން ސިޓީން ބުނެފައި ވަނީ އެ ކްލަބު ކުށެއް ނެތް ކަމަށާއި ކްލަބުގެ ހުރިހާ މައުޤިފަކަށް ބާރުދޭ ދޮގުނުކުރެވޭ ވަރުގެ ހެކިތައް އެބަހުރި ކަމަށެވެ.

މެންޗެސްޓާ ސިޓީއާއި ދެކޮޅަށް 2009 ވަނަ އަހަރުން ފެށިގެން 2018 ވަނަ އަހަރާ ހަމައަށް 115 ދަޢުވާއެއް ކޮށްފައިވާއިރު، އޭގެ ތެރެއިން 114 ދަޢުވާއެއް ވަނީ ޕްރިމިއާ ލީގުން ކުރި ތަހުޤީޤުން ސާބިތުވެފައެވެ. ސިޓީގެ މައްޗަށް އުފުލާފައިވާ މައިގަނޑު ދަޢުވާތަކުގެ ތެރޭގައި 2009 އިން 2018 އަށް މާލީ މަޢުލޫމާތު އޮޅުވާލުމާއި، ކުޅުންތެރިންނާއި މެނޭޖަރުންގެ މުސާރައިގެ ތަފްސީލު ސައްހަކޮށް ހުށަހަޅާފައި ނުވުން ހިމެނެއެވެ. މީގެ އިތުރުން، ލީގުން ކުރިއަށްގެންދިޔަ ތަޙްޤީޤަށް އެއްބާރުލުން ނުދިނުމުގެ ގިނަ ދަޢުވާތަކެއްވެސް ވަނީ އުފުލާފައެވެ.

މި މައްސަލައިގައި ސިޓީ ކުށްވެރިވެއްޖެނަމަ، ދެވިދާނެ އަދަބުތަކުގެ ތެރޭގައި ބޮޑު އަދަދަކުން ޖޫރިމަނާކުރުން، ޕޮއިންޓް އުނިކުރުން ނުވަތަ ޕްރިމިއަރ ލީގުން ވަކިކުރުންވެސް ހިމެނެއެވެ. ލީގުގެ ގަވާއިދު އޮންނަ ގޮތުން މިފަދަ މައްސަލަތަކުގައި ކޮމިޝަނަށް ފެންނަ ކޮންމެ އަދަބެއްވެސް ދިނުމުގެ އިޚްތިޔާރު އޮވެއެވެ. މި އިސްތިއުނާފުގެ ޝަރީޢަތް ނިމެންދެން ސިޓީން ތިބީ ރަސްމީ އިޖުރާއާތުގެ ތެރެއިން ކުރިއަށް ދިއުމަށް ތައްޔާރަށެވެ.