ކުނިއެޅުން މަނާތަނެއްގައި ހުރި ކުނި ފުންޏެއްގައި ރޯވެ ހުޅުމާލެ ފޭސް ދޭއްގައި ހުންނަ އަމާން އުދަރެސް ޓަވަރަށް ގެއްލުންތަކެއް ލިބިއްޖެއެވެ.
މިއަދު އިރުއޮއްސުނުފަހުން ހިނގި މި ހާދިސާގައި އަލިފާންގަނޑު ރޯވެފައިވަނީ އަމާން އުދަރެސް ޓަވަރުގެ އެންމެ ތިރީގައި ހުރި ކުނި ފުންޏެއްގައެވެ. އެމްއެންޑީއެފުން ބުނީ އަލިފާނުގެ ހާދިސާ ހިނގިކަމުގެ ރިޕޯޓް ލިބުނީ 18:43 ހާއިރުކަމަށެވެ.
ހާދިސާގެ މަޢުލޫމާތު ލިބުމާ އެކު، އެތަނަށްގޮސް ފަޔަރ ފައިޓަރުން ކުރި މަސައްކަތުން އަލިފާން ނިއްވާލެވުނީ 18:50 ގައި ކަމަށް އެމްއެންޑީއެފުން ވަނީ ބުނެފައެވެ. އެމްއެންޑީއެފްގެ ފަޔަރ ޓީމުން ވަނީ ނުރައްކާތެރި ކާރިސާއަކަށް ނުވަނީ އެތަނަށްގޮސް އަވަހަށް އަލިފާންގަނޑު ކޮންޓްރޯލްކޮށް ނިންވާލާފައެވެ.
އަލިފާންގަނޑު ނިއްވާލުމަށްފަހު ތަހްގީގީ ޓީމުތަކުން ހަރަކާތްތެރިވަނީ.. ފޮޓޯ: ވޮއިސް
އަލިފާނުގެ މިހާދިސާ އާ ގުޅޭގޮތުން ޓަވަރުގެ ބަލަދުވެރިފަރާތް އެފްޑީސީން އެކްސްގައި ކުރި ޕޯސްޓެއްގައި ބުނީ އަލިފާނުގެ މި ހާދިސާގެ ސަބަބުން ބައެއް ފެންހޮޅިތަކަށް ގެއްލުން ލިބުނު ކަމަށެވެ. ގެއްލުންވި ފެންހޮޅިތައް ރަނގަޅުކުރުމުގެ މަސައްކަތް ފަށާފައިވާކަމަށްވެސް އެފްޑީސީން ބުންޏެވެ.
އަލިފާނުގެ މި ހާދިސާއާ ގުޅިގެން ބައެއް އެޕާޓްމަންޓްތަކުގައި އުޅޭ މީހުންނަށް ވަރަށްބޮޑަށް ދުމުގެ އަސަރު ކުރިކަމަށް ވޮއިސްއަށް ވަނީ އެނގިފައެވެ. އަދި އަލިފާނުގެ ހާދިސާ ހިނގި ދިމާލު އެޕާޓްމަންޓްތަކުން މީހުން ހުސްކުރިކަންވެސް ފާހަގަކޮށްލެވެއެވެ.
ފުލުހުން ދަނީ މި ހާދިސާ ތަހްގީގްކުރަމުންނެވެ.
Advertisement
This content is created and paid for by advertisers and does not involve Voice Journalists
