ރަސްމާލޭގައި އީގަލް ހިލްސް އިން ހިންގަން ނިންމާފައިވާ މަޝްރޫއު އައްޑޫއަށް ގެންދަން އެމްޑީޕީން ތާއީދުކުރާ ކަމުގެ އިޝާރާތެއް ދީފި އެވެ.

މިފަދަ އިޝާރާތެއް ދީފައިވަނީ މިހާރު ކުރިއަށްދާ އެމްޑީޕީގެ ކޮންގްރެސްގަ އެވެ. ކޮންގްރެސްގައި ކުރިއަށް ދިޔަ އިންވެސްޓްމަންޓް ފޯރަމްގައި ރައީސް ނަޝީދު ވަނީ އީގަލް ހިލްސްގެ މަޝްރޫއު އައްޑޫއަށް ގެންދިއުމާމެދު ދެކެނީ ކިހިނެތްތޯ ސުވާލު ކުރައްވާފަ އެވެ.

“މިސާލަކަށް އީގަލް ހިލްސުން އެ ޕްރޮޖެކްޓް އައްޑޫއަށް ގެންނަން އެ ކުންފުނިން އެއްބަސްވެއްޖިއްޔާ ކިހިނެތްބާ އައްޑޫ ސިޓީ ކައުންސިލާއި ރައްޔިތުން ދެކޭނީ،” ނަޝީދު ސުވާލު ކުރެއްވި އެވެ.

އެ ސުވާލަށް އައްޑޫގެ މޭޔަރު އަލީ ނިޒާރު ވަނީ ޖަވާބު ދެއްވާފަ އެވެ. ވިދާޅުވީ މިހާރު އެ އޮތްގޮތަށް އެ މަޝްރޫއު ގެންދާން ބޭނުންނުވާ ކަމަށެވެ.

ނަމަވެސް އެ މަޝްރޫއުގައިވާ ވާގޮތެއް އައްޑޫ ރައްޔިތުންނަށް އެނގޭ ގޮތަށް ބުނެދެވޭނަމަ އެ މަޝްރޫއުއަށް މަރުހަބާ ކިޔަން ތައްޔާރަށް ތިބި ކަމަށެވެ.

އޭގެ ފަހުން ރައީސް ނަޝީދު ވަނީ އީގަލްސްގެ އަރިހުގައި އެކަމަށް އެދެން އެމްޑީޕީއަށް ލޮބީ ކުރާން އެދޭތޯ ސުވާލު ކުރައްވާފަ އެވެ.

ނިޒާރު ވަނީ އެކަމަށް އެދޭ ކަމަށް ވިދާޅުވެފަ އެވެ.