އައްޑޫ ސިޓީ އާއި ފުވައްމުލައް ސިޓީގައި ފެނާއި ނަރުދަމާގެ ޚިދުމަތް ދިނުމާ ގުޅޭ އެންމެހައި އިންފްރާސްޓްރަކްޗަރާއި ވަސީލަތްތައް ފެނަކަ ކޯޕަރޭޝަނުން މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) އަށް ބަދަލުކުރުމުގެ މަސައްކަތް އެއްކޮށް ފުރިހަމަކޮށް ނިންމާލައިފިއެވެ.
މިކަމާ ގުޅޭގޮތުން އެމްޑަބްލިއުއެސްސީގެ މެނޭޖިންގ ޑިރެކްޓަރު ޙުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ކޯޕަރޭޓް ދާއިރާ އިޞްލާޙުކުރުމުގެ ސިޔާސަތުގެ ދަށުން ކުރިއަށް ގެންދެވުނު މުހިންމު މަސައްކަތެއް ކަމަށެވެ. އެގޮތުން، ދެ ސިޓީގެ ފެނާއި ނަރުދަމާގެ ނިޒާމުތަކާ ގުޅޭ ހުރިހާ ވަސީލަތްތަކެއް މިހާރު ވަނީ ޤައުމީ ފެން ކުންފުންޏާ ރަސްމީކޮށް ހަވާލުކޮށް ނިމިފައެވެ.
ފުވައްމުލައް ސިޓީގެ ފެނާއި ނަރުދަމާގެ ޚިދުމަތްތައް އެމްޑަބްލިއުއެސްސީން ރަސްމީކޮށް ހަވާލުކޮށްފައިވަނީ މިދިޔަ ބްރާސްފަތި ދުވަހުއެވެ. މި ބަދަލު ގެނައުމަށްޓަކައި އެމްޑަބްލިއުއެސްސީ އާއި ފެނަކަ ކޯޕަރޭޝަނާ ދެމެދު ވަނީ ޚާއްޞަ ފްރޭމްވޯކް އެއްބަސްވުމެއް އެކުލަވާލައި ސޮއިކޮށްފައެވެ. އަދި އެ އެއްބަސްވުމުގެ ދަށުން ދެ ސިޓީގެ އިންފްރާސްޓްރަކްޗަރ ބަދަލުކުރުމުގެ މަސައްކަތް މިހާރު ވަނީ ފުރިހަމައަށް ނިމިފައެވެ.
އެމްޑަބްލިއުއެސްސީން މަޢުލޫމާތު ދޭގޮތުގައި، މި ނިޒާމުތައް އިތުރަށް ހަރުދަނާކޮށް، ރައްޔިތުންނަށް މެދުކެނޑުމެއްނެތި، އިތުބާރުހުރި އަދި ފެންވަރު ރަނގަޅު ޚިދުމަތެއް ކަށަވަރުކޮށްދިނުމަށް ގިނަ މަސައްކަތްތަކެއް ދަނީ ކުރެވެމުންނެވެ. އެގޮތުން، މިހާތަނަށް ހެދިފައިވާ ފަންނީ އެސެސްމަންޓްތަކަށް ބިނާކޮށް، އައްޑޫ އަދި ފުވައްމުލަކު ސިޓީގެ ޚިދުމަތުގެ ފެންވަރު މަތިކުރުމަށާއި (އަޕްގްރޭޑްކުރުމަށާއި)، އޮޕަރޭޝަނަލް ހިންގުން ހަރުދަނާކުރުމުގެ ޢަމަލީ މަސައްކަތްތައް މިހާރުވެސް ބާރަށް ކުރިއަށްދާ ކަމަށް އެ ކުންފުނިން ބުނެއެވެ.
Advertisement
This content is created and paid for by advertisers and does not involve Voice Journalists
