އެމްޑީޕީގެ އަސާސީ ޤަވާއިދަށް އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއީލް ހުށަހަޅުއްވާފައިވާ އިސްލާހްތައް ގަނޑުކޮށް ފާސްކޮށްފިނަމަ ޕާޓީއަށް އިތުރު މައްސަލަތަކެއް ކުރިމަތިވެދާނޭކަމަށް ހެންވޭރު އުތުރު ގޮފީގެ ރައީސް އަޙްމަދު ޝަފީޤް (ސައްޕެ) ވިދާޅުވެއްޖެއެވެ.
މިހާރު ކުރިއަށްދާ އެމްޑީޕީގެ ކޮންގްރެސްގައި ފައްޔާޒް ހުށަހަޅުއްވާފައިވާ އިސްލާހްތަކާ ގުލޭގޮތުން މެމްބަރުން ހިޔާލްފާޅުކުރުމަށް ދ8ިން ފުރުސަތުގައި ވާހަކަދައްކަވަމުން ސައްޕެ ވިދާޅުވީ އިސްލާހްތައް ގަނޑުކޮށް ފާސްކޮށްފިނަމަ ޕާޓީއަށް ނިކަމެތި ގޮތްތަކެއް ކުރިމަތިވެދާނެ ކަމަށެވެ. އޭނާ ވިދާޅުވީ އެމްޑީޕީގެ ތާރީޚުގައި މިއީ އޭނާ ބައިވެރިވާ ހަތަރުވަނަ ކޮންގްރެސް ކަމަށާއި، ޕާޓީ ތެރޭގައި ކަންކަން ހިނގާފައިވާ ގޮތް ވަރަށް ރަނގަޅަށް އެނގިވަޑައިގަންނަވާ ކަމަށެވެ.
އެމްޑީޕީ ކޮންގްރެސްގެ ތެރެއިން
ފައްޔާޒް ހުށަހެޅުއްވި އިސްލާހުތަކުގެ ތެރޭގައި ރަނގަޅު ކަންތައްތަކެއް ހުރި ނަމަވެސް، އެ ހުރިހާ އިސްލާހުތަކެއް އެއް ޕެކޭޖެއްގެ ގޮތުގައި ގަނޑުކޮށް ވޯޓަށް އަހައި ފާސްކުރުމަކީ ޕާޓީއަށް ލިބޭނެ ވަރަށް ބޮޑު ދެރައެއް ކަމަށް ސައްޕެ ފާހަގަކުރެއްވިއެވެ. އަދި އެގޮތަށް ގަނޑުކޮށް އިސްލާހުތައް ފާސްކުރަން އުޅުމަކީ އޭގެ ފަހަތުގައި ހީލަތްތެރިކަމެއް އޮތް ކަމެއްގެ ގޮތުގައި އޭނާ ސިފަކުރެއްވިއެވެ. އެހެންކަމުން، އިސްލާހުތަކަށް ވަކިވަކިން ވޯޓަށް އެހޭނެ ގޮތަށް އިންތިޒާމުތައް ބަދަލުކުރުމަށް އޭނާ ގޮވާލެއްވިއެވެ.
މީގެއިތުރުން، ޕާޓީގެ ރައީސާއި ނައިބު ރައީސްގެ މަޤާމު އުވާލައި، ހުރިހާ ބާރުތަކެއް އެއް މަޤާމަކަށް ޖަމާވާ ގޮތަށް ގެންނަ ބަދަލުތަކަށް ސައްޕެ ވަރަށް ބޮޑަށް ދެކޮޅު ހެއްދެވިއެވެ. އޭނާ ވިދާޅުވީ ޕާޓީގެ ރައީސާއި ނައިބު ރައީސްގެ މަޤާމަކީ ކުރީގެ ކޮންގްރެސްތަކުގައި ވަރަށް ފުޅާ ދާއިރާއެއްގައި ބަހުސްކޮށް، ފަންނީ އެތައް ބޭފުޅުންނެއްގެ މަޝްވަރާއާއެކު އަސާސީ ޤަވާއިދުގައި ހިމަނާފައިވާ މުހިންމު މަޤާމުތަކެއް ކަމަށެވެ.
އަޅުގަނޑުމެން ވަރަށް ދެކޮޅު ކަމެއް ޕާޓީގެ ރައީސާއި ނައިބު ރައީސް މަޤާމުން ވަކިކުރުމަކީ. އެ ހުރިހާ ބާރުތަކެއް އެކަކަށް ހަވާލުކުރާ ވާހަކަ މި ދައްކަނީ. މިއީ އެއްގޮތަކަށްވެސް ކޮށްގެން ވާނެ ކަމެއް ނޫން. މި ޕާޓީއަކީ ޑިމޮކްރެޓިކް ޕާޓީއެއް
ޝަފީގް
ޕާޓީ އުފެދިގެން އައި ދުވަސްވަރު ޕިކަޕް ބުރެއް ޖަހައިގެންނާއި އެކި ގޮތްގޮތުން ޕާޓީގެ ކުރިއެރުމަށް ކުރި ބުރަ މަސައްކަތްތައް ހަނދާން އައުކުރައްވަމުން ސައްޕެ ވިދާޅުވީ، ޑިމޮކްރެޓިކް ހަމަތަކާއި ހެޔޮވެރިކަމުގެ އަސާސްތައް ހަލާކުވެގެންދާ ގޮތަށް ޕާޓީގެ އަސާސީ ޤަވާއިދު ބަދަލުކުރުމަކީ ހެދޭނެ ވަރަށް ބޮޑު ގޯހެއް ކަމަށެވެ. އަދި ދައުލަތް ހިންގުމުގައްޔާއި ޕާޓީގެ ކަންކަމުގައި ޤާނޫނު އަސާސީއާއި ޑިމޮކްރަސީގެ އަސާސްތަކަށް އިޙުތިރާމްކޮށް، ވަކިވަކި މާއްދާތަކަށް ވަކިން ބަހުސްކޮށް ވޯޓަށް އެހުމަކީ ކޮންމެހެން މުހިންމު ކަމެއް ކަމަށްވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
