ދިވެހިރާއްޖޭގެ ވެރިކަމުގެ ނިޒާމު މިހާރު ހިނގަމުން އަންނަ ގޮތަށް ބަލައި، ބޮޑު ބަދަލަކާދިމާލަށް މިސްރާބް ޖަހަންޖެހޭކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެއެވެ.

"ބޮޑު ބަދަލު" އެމްޑީޕީގެ ކޮންގްރެސްއަށް ހުށަހަޅުއްވައި ދެއްވަމުން ފައްޔާޒް ވަނީ މިފަދަ ބަދަލެއް ގެނައުމަށް ނިންމައި އެކަން އެމްޑީޕީގެ ކޮންގްރެސްއަށް ހުށަހަޅަންޖެހުނު ގޮތް ވަރަށް ސާފްކޮށް ވިދާޅުވެދެއްވާފައެވެ. ފައްޔާޒް ވިދާޅުވީ، މި ބަދަލަކީ ކުރިއަށް އޮތްތަނުގައި އެމްޑީޕީން ކަންކަން ކުރާނޭ ގޮތުގެ ތަސައްވުރެއް ކަމަށެވެ. އެގޮތުން އެފަދަ ތަސައްވުރެއްގެ ބޭނުން މިއަދު ވަރަށްބޮޑުކަމަށް ފައްޔާޒްގެ ވާހަކާގައި ވަނީ ފާހަގަކުރައްވާފައެވެ.

ފައްޔާޒް ފާހަގަކުރެއްވި ގޮތުގައި ގާނޫނުއަސާސީން ތިން ބާރު ވަކިކުރިއިރު އުންމީދު ކުރެވުނީ ރައްޔިތުންގެ މަޖިލީހުން ރައްޔިތުންގެ ހައްގުތައް ހިމާޔަތްކޮށް، ސަރުކާރު ޖަވާބުދާރީ ކުރުވާނެ ކަމަށެވެ. ނަމަވެސް، ވެރިކަން ކުރާ ޕީއެންސީއަށް ރައްޔިތުންގެ މަޖިލީހުގެ ސުޕަ މެޖޯރިޓީ ލިބުމާއެކު، ގާނޫނުއަސާސީގެ ޗެކްސް އެންޑް ބެލެންސްގެ ނިޒާމު އެއްކޮށް ފުނޑުފުނޑުވެ، ހުރިހާ ބާރެއް ރައީސުލްޖުމްހޫރިއްޔާގެ މުށުތެރެއަށް ޖަމާވެފައިވާ ކަމަށް އޭނާ ވިދާޅުވިއެވެ.

މިކަމުގެ ސަބަބުން ކޯޓުތަކާއި މިނިވަން މުއައްސަސާތަކުގެ ބާރު ކެނޑި، ސަރުކާރު ބޭނުންވާ ގޮތަކަށް ފަނޑިޔާރުންނާއި މުއައްސަސާތަކުގެ ވެރިން ވަކިކުރަމުންދާ ކަމުގެ ކަންބޮޑުވުން ފައްޔާޒް ފާޅުކުރެއްވިއެވެ. އޭސީސީ، ޕީޖީ އަދި އިލެކްޝަންސް ކޮމިޝަން ފަދަ ތަންތަނުގެ ބާރު ކެނޑުމުން، ކޮރަޕްޝަނާއި އިސްރާފު އިންތިހާއަށް އިތުރުވެފައިވާ ކަމަށްވެސް ވިދާޅުވިއެވެ.

- ދައުލަތާއި ސަރުކާރުގެ ވެރިޔާ ވަކިކުރުން: ސަރުކާރުގެ ވެރިޔަކީ ރައްޔިތުންގެ އާންމު ވޯޓަކުން އިންތިހާބުކުރާ ފަރާތަކަށް ހެދުމާއެކު، ދައުލަތުގެ ވެރިޔާ މަޖިލީހުން އައްޔަންކުރުން.

- ސުޕްރީމް ކޯޓުގެ ފަނޑިޔާރުން ވަކިކުރުން: މަޖިލީހުން ފަނޑިޔާރަކު ވަކިކުރަން ނިންމި ނަމަވެސް، އެކަމުގެ ފަހުބަސް ބުނާނީ ރައްޔިތުންގެ ސީދާ ވޯޓަކުން ކަމުގައި ހަމަޖެއްސުން.

- ރައްޔިތުންގެ ހިޔާލު ހޯދުން: މުހިންމު ބޮޑެތި ނިންމުންތަކުގައި ރައްޔިތުންގެ ސީދާ ބަސް ހޯދުމަށް ރިފަރެންޑަމްތައް ބޭއްވުން.

މިއީ ބަރުލަމާނީ ނިޒާމެއް ނޫންކަން ސާފުކޮށްދެއްވަމުން ފައްޔާޒް ވިދާޅުވީ، މި ބަދަލުތަކުގެ މައިގަނޑު މަގުސަދަކީ ސަރުކާރުގެ ބާރުތައް ކުޑަކޮށް، އަދުލު އިންސާފު ގާއިމުކުރުމުގެ ފުރިހަމަ މިނިވަންކަން ކޯޓުތަކަށް ހޯދައިދީ، ގާނޫނުއަސާސީގެ ބާރު އަލުން ރައްޔިތުންގެ އަތްމައްޗަށް ރުޖޫއަކުރުން ކަމަށެވެ.