ސަރުކާރުގެ ދެ ކުންފުނިކަމަށްވާ ސްޓޭޓް ޓްރޭޑިން އޯގަނައިޒޭޝަން(އެސްޓީއޯ) އާއި ފެނަކަ ކޯޕަރޭޝަން ކުންފުނި ދަރަމުންދާ މަންޒަރު ފެންނަމުންދާކަމަށް ރައްޔިތުންގެ މަޖިލީހުގެ ސުޕަރ މެޖޯރިޓީ އޮންނަ ސަރުކާރު ހިންގާ މައި ޕާޓީ އެމްޑީޕީގެ ޕީޖީ ލީޑަރު އަދި އައްޑޫ ހިތަދޫ ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ. 

އަސްލަމު މިފަދައިން ވިދާޅުވެފައިވަނީ ސްޓެލްކޯ އަދި ފެނަކައިން ކަރަންޓުގެ ހިދުމަތް ފޯރުކޮށްދެމުން ގެންދާ މާލެއާއި، ރަށްރަށާއި ދެމެދު ވިޔަފާރިތަކަށް ބިލުކުރަމުން ގެންދާ ރޭޓާއި، ބޭންޑުކުރުމުގައި ތަފާތުކުރުންތައް ގެންގުޅޭތީ އެ ކަމުން ރަށްފުށުގެ ކުދި ވިޔަފާރީތައް ހިންގާ ފަރާތްތަކުގެ ވިޔަފާރީއަށާއި އެ ފަރާތްތަކަށް ބޮޑެތި ގެއްލުންތައް ވަމުންދާކަމުގެ ކަންބޮޑުވުންތައް އެފަރާތްތަކުން ފާޅުކުރަމުން ގެންދާކަން ބަޔާންކޮށް ހުށަހަޅާފައިވާ ގަރާރަށް ވާހަކަ ދައްކަވަމުންނެވެ. 

އޭނާ ވަނީ 2020 ވަނަ އަހަރުގެ ތަފާސް ހިސާބުތަކުގެ އަލީގައި ފެނަކަ އާއި ސްޓެލްކޯގެ ދަރަނި އިތުރުވަމުންދާކަން ހާމަކުރައްވާފައެވެ. އަދި ވިދާޅުވީ މިހާރު އެ ދެ ކުންފުނި ދަރާފައިވާ މިންވަރަށް ބަލާއިރު، ސްޓެލްކޯގެ ދަރަނި ދައްކަން 30 އަހަރު، އަދި ފެނަކައިގެ ދަރަނި ދައްކަން 20 އަހަރު ނަގާނެ ކަމަށެވެ.

"2020 ވަނަ އަހަރު ސްޓެލްކޯގެ ހިސާބުތަކަށް ބަލާއިރު 2 ބިލިއަން ރުފިޔާ އާމްދަނީގެ ގޮތުގައި މި ލިބެނީ. ޓެކްސް ކަނޑާފައި 130 މިލިއަން ރުފިޔާ ފައިދާގެ ގޮތުގައި ފެންނަން އޮންނަނީ. މިހެން މިކަން އޮތް އިރު، އެތަނުގެ ދަރަނި، ޓޯޓަލް ލައިބިލިޓީއޭ މިކިޔާ ބައި 3.9 ބިލިއަން ރުފިޔާގައި. 130 މިލިއަން ރުފިޔާއިން މި ދެންނެވި ދަރަނި ދެއްކޭނީ 30 އަހަރުން. ފެނަކަ ކުންފުންޏަށް ބަލާއިރު ފެނަކަ ކުންފުނިން އަހަރަކު ރެވެނިއުގެ ގޮތުގައި ލިބޭ ކަމަށް ބަޔާންކޮށްފައި މިވަނީ 1.7 ބިލިއަން ރުފިޔާ. ޓެކްސް ކަނޑާފައި ފައިދާގެ ގޮތުގައި އަހަރަކު 65 މިލިއަން ރުފިޔާ ލިބޭއިރު އެތަނުގެ ޖުމްލަ ދަރަނި 1.3 ބިލިއަން ރުފިޔާގައި. އެ ދަރަނި އެ ކުންފުނިން ދައްކާނަމަ 20 އަހަރުން އެ ދަރަނި އެ ކުންފުންޏަށް ދެއްކޭނީ" އަސްލަމް ވިދާޅުވިއެވެ. 

އަސްލަމްގެ ވާހަކައިގައި ވަނީ ސަރުކާރުގެ ބޮޑު ދެކުންފުނި ދަރަމުންދާ މަންޒަރު ފެންނަމުންދާކަން ފާހަގަކުރައްވާ ކަންބޮޑުވުން ފާޅުކުރައްވާފައެވެ.