ދަރަންޏަށް ލުއި ހޯދަން އެހެން ގައުމުތަކާ މަޝްވަރާކުރުމުގެ ވިސްނުމެއް ނެތް ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

އަމީރު މިހެން ވިދާޅުވީ މިއަދު ރައްޔިތުންގެ މަޖިލީހުގެ ޖަލްސާގައި ކުޅުދުއްފުށީ އުތުުރު ދާއިރާގެ މެމްބަރު ޔާސިރު އަބްދުއް ލަތީފް ކުރެއްވި ސުވާލަކަށް ޖަވާބު ދެއްވަމުންނެވެ. ޔާސިރު ވަނީ ރާއްޖެއިން ދަރަނި ނަގާފައިވާ ގައުމުތަކަށް ދަރަނި ދެއްކުމުގައި ލުއި ގޮތްތަކެއް ހޯދަން މަޝްވަރާކުރަމުންދޭތޯ މިނިސްޓަރާއި ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން އަމީރު ވިދާޅުވީ، ދުނިޔޭގެ އިޤުތިސާދީ ޙާލަތާ ގުޅިގެން ރާއްޖޭގެ ޚަރަދުތައް ކުޑަކުރުމަށް މަސައްކަތްތަކެއް ކުރެވެމުން އަންނަ ކަމަށެވެ. އެގޮތުން ރާއްޖެއަކީ ޒަމާނުއްސުރެއް ބަރާބަރަށް ދަރަނި އަދާކުރަމުން އަންނަ ގައުމެއް ކަން ފާހަގަކުރައްވާ އަމީރު ވިދާޅުވީ އެއްވެސް އިރެއްގައި ދަރަނި ނުދެއްކިފައި ނެތް ކަމަށެވެ. އެހެންކަމުން ކުރިއަށް އޮތް ތަނުގައިވެސް ރާއްޖެ ޑިފޯލްޓް ވާނެ ހާލަތެއް އަންނާނެ ކަމަށް އަންދާޒާ ނުކުރެއްވޭ ކަމަށް މިނިސްޓަރ ވިދާޅުވިއެވެ.

Advertisement

"ކުރިއަށް އޮތް ތާނގައި ވެސް އަޅުގަނޑުމެން ޑިފޯލްޓްވާނެ ހާލަތެއް އަންނާނެކަމަށް އަޅުގަނޑުމެންނަށް އަންދާޒާއެއް ނުކުރެވޭ. އެހެންވީމާ ދަރަންޏަށް ލުއި ގޮތްތައް ހޯދުމަށްޓަކައި އެކިއެކި ފަރާތްތަކާއި ވާހަކަ ދައްކެމުގެ ވިސްނުމެއް އަދި އަޅުގަނޑުމެންގެ ނުގެންގުޅެން" މިނިސްޓަރ އަމީރު ވިދާޅުވި އެވެ.

އަމީރު މިހެން ވިދާޅުވި އިރު ރާއްޖޭގެ ދަރަނި މަތިވެ ދަރަނިވެރި ވެދާނެ ގައުމުތަކުގެ ތެރޭގައި ރާއްޖެ ހިމެނިދާނެ ކަމަށް ދުނިޔޭގެ މާލީ ބޮޑެތި އިންސްޓްޓިއުޝަންތަކުން ވަނީ ބުނެފަ އެވެ. އެގޮތުން ލޯނުތަކަށް ދައްކަން އޮތް ބޭރުގެ ދަރަނީގެ އަދަދު 94.35 މިލިއަން ޑޮލަރަށް އަރާ ކަމަށް ސަރުކާރުން އެންމެ ފަހުން އާންމުކުރި ތަފާސްހިސާބުތަކުން ދައްކައެވެ.