އިންޑިގޯއިން އިންޑިއާގެ އިތުރު 2 ސިޓީއަކާއި ރާއްޖެއާއި ދެމެދު ޝެޑިއުލް ދަތުރުތައް ފެށުމަށް ތައްޔާރުވެއްޖެއެވެ.

މި ދަތުރުތައް ފެށުމަށް ހަމަޖެހިފައިވަނީ އަންނަ ނޮވެމްބަރު މަހުގެ 1 ވަނަ ދުވަހުން ފެށިގެންނެވެ. ޗެންނާއީ އާއި ހައިދަރުއާބާދުން ރާއްޖެއަށް ޝެޑިއުލް ދަތުރު ފެށުމަށް ހަމަޖެހިފައިވާއިރު، ޗެންނާއީން މާލެއަށް ދަތުރުކުރާނީ އަންގާރަ، ބުރާސްފަތި އަދި ހޮނިހިރު ދުވަހުއެވެ.

އަދި ހައިދަރުއާބާދުން ރާއްޖެއަށް ދަތުރު ކުރާނީ ހޯމަ، ބުދަ، ހުކުރު އަދި އާދިއްތަ ދުވަހުއެވެ. ކޮވިޑް-19 އަށްފަހު އިންޑިގޯގެ ދަތުރުތައް ރާއްޖެއަށް ފަށާފައިވަނީ 2020 ވަނަ އަހަރުގެ ސެޕްޓެމްބަރު މަހުއެވެ.

އިންޑިގޯއިން އިންޑިއާގެ އިތުރު ދެސިޓީއަކާއި ރާއްޖެއާ ދެމެދު ޝެޑިއުލް ދަތުރުތައް ފަށަން ނިންމާފައިވާއިރު، އެ އެއާލައިނުން މިހާރު ދަނީ ބެންގަލޫރާއި މުންބާއިން ރާއްޖެއަށް ޝެޑިއުލް ދަތުރުތައް ކުރަމުންނެވެ.