އިނގިރޭސި ވިލާތުގެ ރާނީ، ރާނީ އެލިޒަބަތު ދެވަނަ، އަވަހާރަ ވުމާއި އެކު ފޮރިންގ މިނިސްޓާ ޝާހިދު އިނގިރޭސި ޝާހީ އާއިލާއަށް ތައުޒިޔާ ވިދާޅުވެއްޖެއެވެ.
ޝާހިދު މިރޭ ކުރެއްވި ޓުވީޓެއްގައި ވިދާޅުވެފައިވަނީ އިނގިރޭސި ތާރީހުގައި އެންމެ ދިގު މުއްދަތަކަށް ވެރިކަން ކުރެއްވި ރާނީ އެލިޒަބަތު އަވަހާރަވި ހަބަރު އެމަނިކުފާނު އަޑުއެއްސެވީ ނުހަނު ހިތާމައާއި އެކު ކަމަށެވެ.
އަދި ކޮމެންވެލްތުގެ ވެރިޔާގެ މަގާމުގައި ހުންނަވާ ރާނީ އެލިޒަބަތު ވަނީ ކޮމެންވެލްތު ގައުމުތަކުގެ ގުޅުމަށް ބޭނުންވި ވަރުގަދަ ލީޑަޝިޕް ދައްކަވާފައިކަމަށާއި މި ދަނޑިވަޅުގައި އިނގިރޭސިވިލާތުގެ ޝާހީ އާއިލާއަށް ތައުޒިޔާ ކިޔުއްވާ ކަމަށް ޝާހިދު ވަނީ ވިދާޅުވެފައެވެ.
ރާނީ އެލިޒަބަތު އަވަހާރަ ވެފައިވަނީ މިއަދު އެކަމަނާގެ ޑޮކްޓަރުން ހެދި އިވެލުއޭޝަނަކަށް ފަހު އެކަމަނާގެ ސިއްހީ ހާލުކޮޅާ މެދު ކަންބޮޑުވާ ކަމަށް ބުނުމުން އެޑްމިޓްކޮށް ފަރުވާދެމުން ދަނިކޮށެވެ. ބީބީސީއިން އާންމުކުރި ގޮތުގައި އެކަމަނާ އަވަހާރަ ވެފައިވަނީ އިނގިރޭސި ވިލާތުގެ ގަޑިން މިއަދު މެންދުރު ފަހުގެ ވަގުތެއްގައި އެވެ.
އިނގިރޭސިވިލާތުގެ ބަލްމޯރަލް ކާސަލްގައި އެކަމަނާ އަވަހާރަވި އިރު އިނގިރޭސި ޝާހީ އާއިލާގެ ގިނަ މެންބަރުން އެކަމަނާގެ އަރިހުގައި ތިއްބެވިއެވެ.
Advertisement
This content is created and paid for by advertisers and does not involve Voice Journalists
