ހަރުކަށި ފިކުރާއި، ގޭންގު ކުށްތަކުގެ އިތުރުން މަސްތުވާތަކެތީގެ ވަބާއަކީ ދިވެހިރާއްޖޭގެ އިޖްތިމާއީ އުފާވެރިކަމަށް އެޅިފައިވާ ކަޅު ހިޔަންޏެއްކަމަށް ރައީސުލް ޖުމްހޫރިއްޔާ އިބުރާހިމް މުހައްމަދު ސޯލިހު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ލ. ގަމުގައ ކުރިއަށްދާ މިއަހަރުގެ ދެވަނަ ވިޔަވަތި ރާއްޖެ ކޮންފަރެންސްގައި ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ ދިވެހިރާއްޖޭގައި ހަރުކަށި ފިކުރު ފެތުރެމުން ދިއުމާއި، ގޭންގު ކުށްތައް އާންމުވުމުގެ އިތުރުން މަސްތުވާތަކެތީގެ ވަބާގައި ޒުވާނުން ޖެހެމުންދިއުމުގެ މައްސަލަތަކަކީ ހަމައެކަނި ސަރުކާރަށް ހައްލުކުރެވޭނެ މައްސަލައެއް ނޫންކަމަށެވެ. އެކަން ހައްލުކުރެވޭނީ ސަރުކާރާއި ގުޅިގެން ހުރިހާ އިދާރާއަކުންވެސް މަސައްކަތްތަކެއް ކުރެވިގެންކަމަށް އެމަނިކުފާނު ވިދާޅުވިއެވެ.
އަދި މިހާރު ކުރިއަށްދާ ވިޔަވަތި ކޮންފަރެންސްގައި މި ކަންކަމާއި މެދު މަޝްވަރާކޮށް، ހައްލުތަކެއް ހޯދުމަށް މަސައްކަތްކުރުމަށްވެސް އެމަނިކުފާނު ވަނީ އެދިވަޑައިގަންނަވާފައެވެ.
"ހަރުކަށި ފިކުރާއި، ގޭންގު ކުށްތަކާއި މަސްތުވާތަކެތީގެ މައްސަލައަކީ ރާއްޖޭގެ އިޖުތިމާއީ އުފާ ފާގަތިކަމަށް އެޅިފައިވާ އެންމެ ކަޅު ހިޔަނި، މިކަމާއި މެދު ފުޅާދާއިރާއެއްގައި ކަވި މަސައްކަތްތަކެއް މި ބައްދަލުވުމުގައި ހިންގަވާދެއްވުން އަޅުގަނޑު އެދެން"
ރައީސް ސޯލިހު ވިދާޅުވިއެވެ.
ރައީސް ސޯލިހު އިތުރަށް ވިދާޅުވީ ރާއްޖޭގެ ކަންކަން ވިލަރެސް ކުރުމުގައި މި ކޮންފަރެންސްގެ ނިންމުންތަކަށް ރިއާޔަތް ކުރެވި އަމަލީ ސިފަ ގެންނާނެ ކަމުގެ ޔަގީނކަން ދެއްވާކަމަށެވެ.
ލ. އަތޮޅުގައި ކުރިއަށްގެންދާ ވިޔަވަތި ކޮންފަރެންސްއަކީ ސީދާ ރައީސްގެ އިސްނެންގެވުމުގެ މަތިން ދިވެހިރާއްޖޭގެ އިދާރީ ދާއިރާތައް ލާމަރުކަޒުކޮށް ހިންގުން ހަރުދަނާކޮށް، ފާއިތުވި އަހަރުގެ ތަޖުރިބާގެ އަލީގައި، މި ނިޒާމް ހަރުދަނާކުރުމަށް، ސަރުކާރުގެ ވަޒީރުންނާއި، ރައީސުލްޖުމްހޫރިއްޔާގެ އޮފީހުގެ އިސްވެރިންނާއި، ދެކުނުގެ އަތޮޅުތަކުގެ ރައްޔިތުންގެ މަޖިލީހުގެ މެމްބަރުންގެ އިތުރުން، ސަރުކާރުގެ ކުންފުނިތަކުގެ އިސްވެރިންނާއި، ކަމާއިގުޅޭ އެކި ދާއިރާތަކުގެ ފަންނީ ބޭފުޅުން ހިމެނޭގޮތުން ބާއްވާ އަންނަ ކޮންފަރެންސެކެވެ.
Advertisement
This content is created and paid for by advertisers and does not involve Voice Journalists
