ދުނިޔެ ސާފުކުރުމުގެ ދުވަހުގެ ހަރަކާތްތަކުގައި ވީހާވެސް ގިނަ އިދާރާތަކުން ބައިވެރިވުމަށް އެންވަޔަރަންމަންޓަލް ޕްރޮޓެކްޝަން އޭޖެންސީ، އީ.ޕީ.އޭއިން އެދިއްޖެއެވެ.

ދުނިޔެ ސާފުކުރުމުގެ ދުވަހާގުޅޭ ގޮތުން އީޕީއޭއިން މިއަދު ނެރުނު ސާކިއުލަރއެއްގައި ބުނެފައިވަނީ މިމަހުގެ 17 ވާ ހޮނިހިރު ދުވަހަކީ މި އަހަރުގެ ދުނިޔެ ސާފުކުރުމުގެ ދުވަސްކަމުން، ސަރުކާރުގެ އިދާރާތަކާއި ސްކޫލްތަކާއި ރިސޯޓުތަކާއި މިނޫންވެސް އެހެނިހެން ފަރާތްތަކުން މި އަހަރުގެ ދުނިޔެ ސާފުކުރުމުގެ ދުވަހަށް ސާފުކުރުމުގެ ޕްރޮގްރާމްތައް ރާވާ ހިންގުމަށް އެ އެޖެންސީއިން އެދޭކަމަށެވެ.

"ވޯލްޑް ކްލީންއަޕް ޑޭ" ނުވަތަ ދުނިޔެ ސާފުކުރުމުގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ސެޕްޓެމްބަރުމަހުގެ 3 ވަނަ ހޮނިހިރު ދުވަހުއެވެ. 

އެގޮތުން އެފަދަ ޕްރޮގްރާމްތައް ރާވާފަރާތްތަކުން ދުނިޔެ ސާފުކުރުމުގެ ދުވަހުގެ ވެބްސައިޓް (www.worldcleanupday.org) ގައި ރަޖިސްޓަރކޮށް ވެބްސައިޓުގައި އެ ޕްރޮގްރާމް ހިމެނުމަށްވެސް އީޕީއޭއިން ނެރުނު ސާކިއުލާގައި ބުނެފައިވެއެވެ. 

ދުނިޔެ ސާފުކުރުމުގެ ދުވަހަކީ ބައިނަލްޢަޤްވާމީ ގޮތުން ދުނިޔޭގެ ހުރިހާ ޤައުމަކުން ބައިވެރިވެ އެއްދުވަހެއްގައި ސާފުކުރުމުގެ މަސައްކަތް ކުރުމަށް ކަނޑައަޅާފައިވާ ދުވަހެކެވެ. އެގޮތުން، ގޮނޑުދޮށާއި، މޫދާއި، މަގުތަކާއި، މިނޫންވެސް ތަންތަނުގައި ހުރި ކުނިތައް ނަގައި ސާފުކޮށް އެފަދަ ކުނި ރައްކާތެރިގޮތުގައި ނައްތާލުމުގެ މަސައްކަތްތައް ރާވައިގެން މި ދުވަހުގައި ކުރެއެވެ.