ގދ. އަތޮޅު ކައުންސިލުން ބާއްވާ މި އަހަރުގެ އަތޮޅު އެތްލެޓިކްސް މުބާރާތް ހުޅުވުމުގެ ރަސްމިއްޔާތަށް މާލެ ސިޓީގެ މޭޔަރު ޑރ މުޙައްމަދު މުއިއްޒު ތިނަދޫއަށް ވަޑައިގެންފިއެވެ. 

މާލެ ސިޓީ ކައުންސިލުން އާންމު ކޮށްފައިވާ ގޮތުގައި މޭޔަރު ޑރ މުއިއްޒު ތިނަދޫއަށް ވަަޑައިގެންފައި ވަނީ ހޮނިހިރު ދުވަހުއެވެ. މޭޔަރުގެ އިތުރުން މި ދަތުރުފުޅުގައި ޑެޕިއުޓީ މޭޔަރު އަހުމަދު ނަރީޝް އާއި ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު އަދި، މެދު ހެންވޭރު ދާއިރާގެ ކައުންސިލަރު އާދަމް ރަމީޒްގެ އިތުރުން މާފަންނު ހުޅަނގު ދާއިރާގެ ކައުންސިލަރު އިބްރާހިމް އަބޫބަކުރު ވެސް ވަނީ ބައިވެރިވެވަޑައިގަނެފައެވެ.

ތިނަދޫއިން މޭޔަރު ޑރ މުއިއްޒު އަދި އަރިހުގައި ވަޑައިގެންނެވި ބޭފުޅުންނަށް މަރުހަބާ ދަންނަވާފައިވަނީ ގދ. އަތޮޅު ކައުންސިލްގެ ރައީސް ހަސަން ފައިހަތު ގުދްރަތުالله އާއި އެތްލެޓިކްސް ޓީމުގެ އިތުރުން އެ ރަށުގެ އާންމު ރައްޔިތުންނެވެ.  

Advertisement

ގދ. އަތޮޅު ކައުންސިލުގެ ދައުވަތަކަށް މޭޔަރު މުއިއްޒު ކުރައްވާ މި ދަތުރުފުޅު ނިންމަވާލެއްވުމަށްފަހު މޭޔަރ ޑރ މުއިއްޒު މާލެ ވަޑައިގަތުމަށް ހަމަޖެހިފައިވަނީ މި މަހުގެ 12 ވާ ހޯމަ ދުވަހުއެވެ.