ރައްޔިތުންގެ ކުރިމަތީގައި ހޯމް މިނިސްޓަރު އިމްރާން ތައުބާވާން ޖެހޭ ކަމަށް ކުރީގެ ނައިބު ރައީސް އަދި ގާނޫނީ ވަކީލު ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ލ. ގަމުގާ ކުރިއަށްދާ "ވިއަވަތި" ކޮންފަރެންސްގައި އިމްރާން ވަނީ ރައީސް އިބްރާހިމް މުހައްމަދު ސޯލިހް ކުރައްވަނީ ކީރިތި ގުރުއާނުގައި އަންގަވާފައިވާ ފަދަ، އަދި ރަސޫލާ ޞޢވ ކުރެއްވި ފަދަ ހެޔޮ ވެރިކަމެއް ކަމަށް ވިދާޅުވެފައެވެ.
އިމްރާން ދެއްކެވި ވާހަކަތަކާއި ގުޅުވައި ޑރ.ޖަމީލް މިއަދު ކުރެއްވި ޓުވީޓެއްގައި ވިދާޅުވީ، ކީރިތި ރަސޫލާ އަކީ އަޝްރަފުލް މަޚްލޫޤާތު ކަމަށާއި، ބަނގުރަލުގެ ޙުކުމް އައިސްފައިތިބި އަދި ދީނުގެ ބޮޑެތި ކުށްތަކުގެ ތުހުމަތު ކުރެވޭ މީހުންނާ އެކަލޭނގެފާނާ މުޤާރަނާ ކުރުން އުޅުމަކީ ކުފުރުގެ ޢަމަލެއް ކަަމަށެވެ.
ލާމަރުކަޒީ އުސޫލުން އިދާރީ ދާއިރާތައް ހިންގުމަށް ސަރުކާރުން ކުރަމުންދާ މަސައްކަތަކާއި ގުޅޭގޮތުން އިއްޔެ ލ.އަތޮޅުގައި ފެށި"ވިއަވަތި" ރާއްޖެ ކޮންފަރެންސްގައި ވާހަކަ ދައްކަވަމުން މިނިސްޓަރު އިމްރާން ވިދާޅުވީ ލާމަރުކަޒީ ނިޒާމަކީ ރާއްޖެ ތަރައްގީކޮށް ހަމަހަމަ ފުރުސަތު ތަނަވަސްކުރުމަށް ރައީސް އެންމެ އިސްކަމެއް ދެއްވާ ސިޔާސަތު ކަމަށެވެ. އަދި މިއަދުގެ މި ވެރިކަމުން އެ ސިފަތައް އެންމެ ރީތި ގޮތުގައި އެންމެ ފުރިހަމަ ގޮތުގައި ފެންނަމުންދާ ކަމަށްވެސް އިމްރާން ވިދާޅުވިއެވެ.
Advertisement
This content is created and paid for by advertisers and does not involve Voice Journalists
