މޫސުމީ ބަދަލުތަކުގެ އަސަރު އެންމެ ބޮޑަށް ލިބޭނީ، ރާއްޖެ ފަދަ ތިރި ޖަޒީރާ ޤައުމުތަކަށް އެކަންޏެއް ނޫން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ލ. ގަމުގައި މިހާރު ކުރިޔަށްދާ ތިން ވަނަ ވިއަވަތި ރާއްޖެ ކޮންފަރެންސްގެ އެންމެފަހު ސެޝަންގައި ދެއްކެވި ވާހަކަފުޅުގައެވެ.

ރައީސް ވިދާޅުވީ، މުޅި ދުނިޔެއަށް މިއަދު ކުރިމަތިވެފައި އޮތް އެންމެ ބޮޑު ނުރައްކަލަކީ، މޫސުމަށް މިއަންނަ ބަދަލުގެ ސަބަބުން ކުރިމަތިވެފައިވާ ގޮންޖެހުންތައްކަމަށެވެ. ރައީސުލްޖުމްހޫރިއްޔާ ވިދާޅުވީ، ކުރިން ދެކެވެމުން އައީ، މޫސުމީ ބަދަލުތަކުގެ އެންމެ ބޮޑު އަސަރަކާއި އެންމެ ބޮޑު ގެއްލުމެއް އެންމެ އަވަހަށް ލިބޭނީ، ރާއްޖެ ފަދަ ތިރި ކުދި ޖަޒީރާ ޤައުމުތަކަށް ކަމަށެވެ.

Advertisement

އެހެން ނަމަވެސް މިއަދުގެ ޙަޤީޤަތަކީ، އެއްވެސް ބަޔަކަށް، އެއްވެސް ޤައުމަކަށް، ބިންތިރިޔަސް، އަދި ބިން އުހަސް، ފަރުބަދަ މަތީ ޤައުމަކަސް، މިކަމުން ސަލާމަތްވެވެން ނެތްކަން ކަމުގައި އެމަނިކުފާނު ވިދާޅުވިއެވެ. މިގޮތުން ރައީސުލްޖުމްހޫރިއްޔާ ވަނީ، ހޫނު މޫސުމުގައި ޔޫރަޕަށް ކުރިމަތިވެގެން ދިޔަ ކަންކަމުން މިސާލު ދައްކަވާފައެވެ. އަދި މޫސުމީ ބަދަލުތަކުގެ ސަބަބުން ކުރިމަތިވެދާނެ ކަންކަމުގެ ވާހަކައަކީ މިހާރު މުޅި ދުނިޔޭގެ ވާހަކައެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ، ކުރިން މޫސުމީ ބަދަލުތަކާއި ދޭތެރޭގައި ދެކެމުން އެ އައިގޮތް މިހާރު ވަނީ ބަދަލުވެފައި ކަމަށެވެ. އަދި މޫސުމީ ބަދަލުތަކުގައި ނެތިގެން ދާނީ، ވަކި ޤައުމެއް ނުވަތަ ވަކިބައެއް ނޫންކަން ފާހަގަ ކުރައްވައި އެކަމުގެ ސަބަބުން ނެތިގެން ދާނީ، މުޅި ޖީލުކަމުގައި ފާހަގަކުރެއްވިއެވެ. އެހެންކަމުން މިއީ، މިކަމުގައި ކުޑަ ޤައުމެއް، ބޮޑުޤައުމެއް ނެތި އެންމެން އެކީގައި މަސައްކަތްކުރަން ޖެހިފައި އޮތް ދަނޑިވަޅުކަން ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ.