ރާނީ އެލިޒަބަތުގެ ޖަނަޒާ އާއި ގުޅިގެން އަންނަ ހަފްތާ ކުޅުމަށް ހަމަޖެހިފައިވާ ޕްރިމިއާ ލީގުގެ ތިން މެޗެއް ކެންސަލް ކޮށްފިއެވެ. 

ޕްރިމިއާ ލީގުން މިރޭ ނެރުނު ބަޔާނެއްގައި ބުނެފައިވަނީ އަންނަ ހަފްތާ ކުޅުމަށް ހަމަޖެހިފައިވާ ޕްރިމިއާ ލީގުގެ 10 މެޗުގެ ތެރެއިން ތިން މެޗެއް ކެންސަލްކޮށް ފަހުގެ ތާރީހެއްގައި ކުޅުމަށް ނިންމާފައިވާ ކަމަށެވެ. 

އަންނަ ހަފްތާގެ މެޗުތަކުގެ ތެރެއިން ކެންސަލް ކުރުމަށް ނިންމާފައިވަނީ މެންޗެސްޓާ ޔުނައިޓެޑާއި ލީޑްސް ޔުނައިޓެޑު ވާދަކުރާއި މެޗާއި، ލިވަޕޫލާއި ޗެލްސީ ވާދަކުރާ މެޗުގެ އިތުރުން ބްރައިޓަން އާއި ކްރިސްޓަލް ޕެލެސް ވާދަކުރާ މެޗެވެ. މި މެޗުތައް ދެން ކުޅޭނެ ތާރީހެއް ފަހުގެ ތާރީހެއްގައި އިއުލާން ކުރެވޭނެ ކަމަށް ޕްރިމިއާ ލީގުގެ ބަޔާނުގައި ވަނީ ބުނެފައެވެ. 

Advertisement

ޕްރިމިއާ ލީގުން ބުނެފައިވަނީ މި ތިން މެޗު ކެންސަލް ކުރުމަށް ނިންމާފައިވަނީ ރާނީގެ ޖަނާޒާއަށް އެހީތެރިވުމުގައި އެ ގައުމުގެ ފުލުހުން ހަރަކާތްތެރިވަމުން ދިއުމާއި ގުޅިގެން މި މެޗުތަކުގެ ހަމަޖެހުން ބެލެހެއްޓޭ ވަރަށް ފުލުހުން ލިބެން ނެތުމުން ކަމަށެވެ. އަދި މިކަމާއި ގުޅިގެން ޓީމު ތަކާއި، ފުލުހުންނާއި، ކަމާބެހޭ އިދާރާތަކުގެ ވެރިންނާއި މިކަމުގައި މަޝްވަރާކޮށްފައިވާ ކަމަށްވެސް ޕްރިމިއާ ލީގުން ބުނެފައިވެއެވެ. 

އަންނަ ހަފްތާ އަށް ރޭވިފައިވާ އަނެއް ހަތް މެޗު ކުރިއަށްދާނެ ކަމަށްވެސް ޕްރިމިއާ ލީގުން ވަނީ ބުނެފައެވެ. ރާނީ އަވަހާރަ ވުމާއި ގުޅިގެން މި ހަފްތާގެ ޕްރިމިއާ ލީގުގެ ހުރިހާ މެޗުތަކެއްވެސް ވަނީ ކެންސަލް ކޮށްފައެވެ. 

ރާނީ އެލިޒަބަތު ދެވަނައިގެ ޖަނާޒާ ބޭއްވުމަށް ހަމަޖެހިފައިވަނީ މި މަހުގެ 19 ވަނަ ދުވަހު އިނގިރޭސިވިލާތުގެ ވެރިރަށް ލަންޑަން ގައެވެ.