މަންމާފުޅު ރާނީ އެލިޒަބަތު ދެވަނައިގެ ހަށިކޮޅުގެ ފަހަތުން ވަޑައިގަންނަވަނިކޮށް ސްކޮޓްލޭންޑުގެ އެޑިންބަރާގައި ޕްރިންސް އެންޑްރިއު އަކީ ޖިންސީ ކުށްވެރިއެއްކަމަށް ބުނި މީހަކު ހައްޔަރުކޮށްފިއެވެ.
މައުލޫމާތު ލިބޭ ގޮތުގައި ހައްޔަރުކޮށްފައިވާ ފިރިހެންމީހާ ވަނީ ޕްރިންސް އެންޑްރިއު އަކީ މުޑުދާރު މުސްކުޅި މީހެއް ކަމަށް ބުނެފައެވެ. ފުލުހުންގެ ބެލުމުގެ ދަށުގައި ހުރެގެން އެމީހާ ފަހުން މީޑިއާ އަށް ބުނެފައިވަނީ ބާރުގަދަ ފަރާތްތަކުން ޖިންސީ ކުށްތަކަށް އަރައިގަނެ އެކުށްތަކަށް އަދަބެއް ނުލިބި ސަލާމާތް ވެގެން ނުވާނެ ކަމަށެވެ.
މިދިޔަ އަހަރު ޕްރިންސް އެންޑްރޫ ވަނީ އޭނާއާ ދެކޮޅަށް ޖިންސީ ފުރައްސާރައިގެ މައްސަލައެއް ހުށައެޅި އާއްމު ސިވިލް ކޯޓެއްގައި މައްސަލައިގެ ޝަރީއަތް ކުރިއަށްދަނިކޮށް އޭނާގެ ޝާހީ ޒިންމާތައް ދޫކޮށްލައްވާފައެވެ.
މީގެ އިތުރުން އެމެރިކާގައި ގިނަ އަދަދެއްގެ ކުޑަ އަންހެން ކުދިން ޓްރެފިކްކޮށް، އެ ކުދިންނަށް ޖިންސީ ގޯނާ ކުރުމަށް "ސެކްސް ރިންގް" އެއް ހިންގި ޖެފްރީ އެޕްސްޓީން އާއި ޕްރިންސް އެންޑްރިއު ގާތް ގުޅުމެއް ބާއްވާ ސެކްސް ރިންގުގައި ބައިވެރިވި ކަމުގެ ތުހުމަތު އެންޑްރިއުއަށްވެސް ކުރެވިފައިވެއެވެ.
މި ހާދިސާ ހިނގާފައިވަނީ ރާނީގެ ހަށިކޮޅު ހޮލީރުޑްހައުސްއާ ގަނޑުވަރުން އެޑިންބަރާގައި ހުންނަ ސެއިންޓް ގައިލްސަސް ކެތީޑްރަލް އަށް ގެންދިއުމުގެ މަގުމަތީގައެވެ. ރާނީގެ ހަށިކޮޅު ސްކޮޓްލޭންޑުގެ މަގުތަކުން ގެންދަމުންދާއިރު ގިނަ ބަޔަކު ދަނީ މަގުތަކަށް ނިކުމެ ރާނީއަށް އިހުތިރާމް އަދާކުރަމުންނެވެ.
Advertisement
This content is created and paid for by advertisers and does not involve Voice Journalists
