މިވަގުތު ލ. އަތޮޅުގައި ހަރަކާތްތެރިވަމުންދާ ކަނޑުގެ ދިރާސާ ޓީމަށް ރައީސް ޞާލިހް ސަޕްރައިޒް ޒިޔާރަތެއް ކުރައްވައިފިއެވެ.  

މޫސުމީ ބަދަލުގެ ސަބަބުން ރާއްޖޭގެ ކަނޑުތަކަށް ކުރަމުންދާ އަސަރުތައް ދެނެގަތުމަށް ކުރަމުންދާ ދިރާސާ އިއްޔެ ފަށާފައިވަނީ ލ. އަތޮޅުގެ ކަނޑުގެ ސަރަހައްދުންނެވެ.

މިހާރު ލ. ގަމުގައި ކުރިއަށްދާ 'ވިއަވަތި' ރާއްޖެ ކޮންފަރެންސުގައި ބައިވެރިވެވަޑައިގަތުމަށް ވަޑައިގެން ހުންނެވުމަށްފަހު ރައީސް ޞާލިހް މި ދިރާސާގެ މައި އުޅަނދައް ވަޑައިގެންފައިވަނީ މިއަދުގެ ވަގުތެއްގައެވެ. ރައީސް ޞާލިހްގެ އަރިހުގައި މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާ ވެސް ވަނީ ބައިވެރިވެ ވަޑައިގެންފައެވެ. 

Advertisement

މި ދިރާސާ ކުރިއަށް ގެންދާ ނެކްޓަން އިން ކުރި ޓުވީޓެއްގައި ބުނެފައިވާ ގޮތުން ރައީސްގެ މި ޒިޔާރަތަކީ ސަޕްރައިޒް ޒިޔާރަތެކެވެ. މި ދިރާސާގައި ބައިވެރިވާ ސައިންސްވެރިން ވަނީ ލ. އަތޮޅު ކަނޑު ތަކުގެ 1400 ފޫޓު އަޑީގެ 3D ޗާޓެއްވެސް ރައީސް ޞާލިހަށް ދައްކާލާފައެވެ. ރައީސް ޞާލިހް ވަނީ މި ދިރާސާގެ ބައިވެރިންނާއި ބައްދަލުކޮށް ދިރާސާގެ މައުލޫމާތު ހޯއްދަވާ ހިއްވަރުދެއްވާފައި ކަމަށްވެސް ނެކްޓަން އިން ބުނެފައިވެއެވެ. 

ޖުމްލަ 40 މީހުންގެ ޓީމަކުން ބައިވެރިވާ މި ދިރާސާގައި ދުނިޔޭގެ އެކި ކަންކޮޅުތަކުންނާއި ރާއްޖޭން އެކުލަވާލާފައިވާ ސައިންސްވެރިންނާއި ތަޖުރިބާކާރުންގެ ޓީމަކުން ސާވޭކުރާނެ ކަމަށް ނެކްޓަން އިން ވަނީ ބުނެފައެވެ.