ރާނީ އެލިޒަބަތުގެ ޖަނާޒާއާއި ގުޅިގެން ޔޫރަޕާ ލީގުގައި އިނގިރޭސިވިލާތުގެ އާސެނަލް އާއި ހޮލެންޑުގެ ޕީއެސްވީ ކުޅުމަށް ހަމަޖެހިފައިވާ މެޗު ކެންސަލް ކޮށްފިއެވެ.

ލަންޑަންގައި ހުންނަ އާސެނަލްގެ އެމިރޭޓްސް ދަނޑުގައި އަންނަ ބުރާސްފަތި ދުވަހު ކުޅުމަށް ހަަމަޖެހިފައިވާ މެޗު ކެންސަލް ކޮށް ފަހުގެ ތާރީހެއްގައި ކުޅުމަށް ނިންމިކަން މިއަދު އާސެނަލް އިން ވަނީ ކަށަވަރު ކޮށްދީފައެވެ. އާސެނަލްއިން ނެރުނު ބަޔާނެއްގައި ބުނެފައިވަނީ މި މެޗު ކެންސަލް ކުރުމަށް ނިންމާފައިވަނީ ރާނީ އަވަހާރަ ވުމާއި އެކަމަނާގެ ޖަނާޒާއަށް ވަމުންދާ ތައްޔާރީތަކާއި ގުޅިގެން ދެ ޓީމާއި ލަންޑަންގެ ފުލުހުން އަދި ޔޫއެފާގެ އޮފިޝަލުންނާ މަޝްވަރާކުރުމަށްފަހުގައި ކަމަށެވެ.

އަދި މި މެޗު ދެން ކުޅެވޭނެ ތާރީހެއް ހަމަޖެއްސުމައް ކަމާބެހޭ އިދާރާތަކާއި މަޝްވަރާ ކުރަމުންދާ ކަމަށްވެސް އާސެނަލްއިން ބުނެފައިވެއެވެ. މީގެ އިތުރުން މި މެޗަށް މިހާތަނަށް ގަނެފައިވާ މެޗު ޓިކެޓުތަކާއި އެހެން ބުކިންތައް ދެން މެޗު ބޭއްވޭ ތާރީހަކަށް ލަސްކުރުމުގެ އިންތިޒާމު އެ ޓީމުން ހަމަޖައްސައިދޭނެ ކަމަށްވެސް އާސެނަލްގެ ބަޔާނުގައި ބުނެފައިވެއެވެ.

Advertisement

ފާހަގަ ކޮށްލެވޭ ގޮތުގައި ރާނީގެ މަރާއި ގުޅިގެން މި ހަަފްތާގެ ޕްރިމިއާ ލީގުގެ ހުރިހާ މެޗެއް ކެންސަލްކޮށް އަންނަ ހަފްތާގެ ތިން މެޗެއް ކެންސަލްކޮށްފައިވާކަމަށްވެސް އެ ލީގުން ވަނީ އިއުލާންކޮށްފައެވެ.