ޖީއެސްޓީ ހިމެނޭހެން، ހުށަހަޅަން ޖެހޭ ޓެކްސް ބަޔާން ހުށަނާޅާ ފަރާތްތަކާއި ޓެކުހާއި ފައިސާ ނުދައްކާ ފަރާތްތަކުގެ ނަންތައް ހާމަކުރާނެ ކަމަށް، މޯލްޑިވްސް އިންލެންޑް ރިވެނިއު އޮތޯރިޓީ (މީރާ) އިން ބުނެފިއެވެ.

މީރާއިން މިއަދު ކުރި އިއުލާނެއްގައި ބުނީ ޓެކްސް ބަޔާން ހުށަނާޅާ އަދި ޓެކުހާއި ފައިސާ ނުދައްކާ ފަރާތްތަކުގެ ނަން ހާމަކުރާ އުސޫލުގެ ދަށުން، މިދިޔަ އަހަރުގެ ނިޔަލަށް ހިނގާފައިވާ މުއްދަތުތަކަށް ނިސްބަތްވާ ޓެކްސް ބަޔާން ހުށަނާޅާ ފަރާތްތަކާއި، ޓެކުހާއި ފައިސާ ދައްކާފައިވާ ނުވާ ފަރާތްތަކުގެ ނަންތައް ހާމަކުރާނެ ކަމަށެވެ.

އެގޮތުން އިންކަމް ޓެކްސް ފިޔަވައި، ޖީއެސްޓީ އާއި ގްރީން ޓެކްސްގެ އިތުރުން ވިތުހޯލްޑިން ޓެކްސްގެ ބަޔާން ހުށަނާޅާ ފަރާތްތަކާއި ޓެކުހާއި ފައިސާ ނުދައްކާ ފަރާތްތަކުގެ މައުލޫމާތު މިމަހުގެ ތެރޭގައި ހާމަކުރާނެ ކަމަށްވެސް ބުނެފައިވެއެވެ. އަދި އިންކަމް ޓެކްސް ބަޔާން ހުށަނާޅާ، ދައްކާފައިނުވާ ފަރާތްތަކުގެ މައުލޫމާތު އަންނަ މަހުގައި ހާމަކުރާނެ ކަމަށްވެސް މީރާއިން ބުނެ އެވެ.

ހަމަ އެހެންމެ، ދައުލަތަށް ދައްކަން ޖެހޭ ފައިސާ އާއި ޓެކްސް ނުދައްކާ ތިބި ފަރާތްތަކުގެ އަތުން ފައިސާ ހޯދުމުގެ ގޮތުން، އެ އިދާރާގެ އެންފޯސްމަންޓް ޕޮލިސީގެ ދަށުން އަޅަން ޖެހޭ ފިޔަވަޅުތައް އަޅާނެ ކަމަށް މީރާ އިން ބުންޏެވެ. މީރާ އިން ވަނީ ޓެކުހާއި ފައިސާ ނުދައްކާ، އަދި ބަޔާން ހުށަނާޅާ ފަރާތްތަކަށް ދެ އިހުތިޔާރެއް ދީފައެވެ. އެގޮތުން ލަސްނުވެ ފައިސާ ދައްކުމާއި، ބަޔާން ހުށަހެޅުމަށް ވަނީ އެދިފައެވެ. އަދި މީރާ އަށް ޓެކްސް ދެއްކުމުގެ އެއްބަސްވުމަކަށް އައުމަށްވެސް ވަނީ އެދިފައެވެ.