ރާއްޖޭގެ ކަނޑުގެ ސަރަހައްދުގައި ޤަވާއިދާ ޚިލާފަށް މަސްވެރިކަން ކުރި ބޭރުގެ ދެ އުޅަނދެއް ޖޫރިމަނާކޮށްފިއެވެ.
ފިޝަރީޒް މިނިސްޓްރީން ބުނީ މަސްވެރިކަމުގެ ޤާނޫނުގެ ދަށުން އުޅަނދުތަކުގެ ވެރިފަރާތަށް އިދާރީ ފިޔަވަޅުގެ ގޮތުގައި ކަނޑައެޅި ޖޫރިމަނާ ފައިސާ ދެއްކުމުން އެ އުޅަނދުތައް ފުރައިގެން ދިއުމުގެ ހުއްދަ މިހާރު ދީފައިވާ ކަމަށެވެ. އެގޮތުން ފިޔަވަޅު އަޅާފައިވަނީ ސްރީލަންކާގެ ދެ އުޅަނދަކަށެވެ. އެ ދެއުޅަނދު ޖޫރިމަނާކޮށްފައިވަނީ ހަތް ލައްކަ ރުފިޔާއިންނެވެ.
މިނިސްޓްރީން ބުނީ އެއުޅަނދު ޖޫރިމަނާކޮށްފައިވަނީ ދިވެހިރާއްޖޭގެ ކަނޑުގެ ސަރަހައްދުގައި މަސްވެރިކަން ކޮށްފައިވާތީއާއި ދިވެހިރާއްޖޭގެ ކަނޑުގެ ސަރަހައްދަށް މިނިސްޓްރީގެ ހުއްދަ ހޯދުމަކާއި ނުލައި ވަނުމުގެ ސަބަބުންނެވެ. އެ އުޅަނދުގައި 3 ޓަނުގެ މަސް ހުރިކަމަށް ފިޝަރީޒް މިނިސްޓްރީން ބުނެއެވެ.
އަދި ދެވަނަ އުޅަނދު އެއްލައްކަ ރުފިޔާއިން ޖޫރިމަނާކޮށްްފައިވަނީ ދިވެހިރާއްޖޭގެ ކަނޑުގެ ސަރަހައްދަށް މިނިސްޓްރީގެ ހުއްދަ ހޯދުމަކާއި ނުލައި ވަނުމުގެ ސަބަބުން ކަމަށް މިނިސްޓްރީން ބުންޏެވެ.
މިނިސްޓްރީން އިތުރަށް ބުނީ މަސްވެރިކަމުގެ ޤާނޫނުގެ 80 ވަނަ މާއްދާގައި ބަޔާންކޮށްފައިވާ ގޮތުގެ މަތިން އުޅަނދުގެ ވެރި ފަރާތަށް ޖަވާބުދާރީވުމުގެ ފުރުސަތު ދީފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
