ސޯޝަލް މީޑީއާގައި ބަރަހަނާ ފޮޓޯއާއި ވީޑިއޯ އާންމުކުރުމުން ފުލުހުން ހައްޔަރުކޮށްފައިވާ މުޙައްމަދު ނަބީލު (ޔާޔާ ނަބީލް)ގެ ބަންދަށް 10 ދުވަސް ޖަހައިފިއެވެ. 

މީގެ ކުރިންވެސް މިފަދަ މައްސަލައެއްގައި ތަކުރާރުކޮށް ހައްޔަރުކޮށްފައިވާ ޔާޔާ ނަބީލް މިފަހަރު ހައްޔަރުކޮށްފައިވަނީ މި ފަހުން އަނެއްކާވެސް ސޯޝަލް މީޑިއާގައި، ބަރަހަނާ ފޮޓޯއާއި ވީޑިއޯ އާންމުކުރުމުގެ މައްސަލައެއްގައެވެ. 

މިފަހަރު ފުލުހުން އޭނާ ހައްޔަރުކޮށްފައިވަނީ އިއްޔެގެ ވަގުތެއްގައި ކޯޓު އަމުރެއްގެ ދަށުންނެވެ. 

Advertisement

މިދިޔަ މަހުވެސް މިފަދަ މައްސަލައެއްގައި ޔާޔާ ނަބީލް ހައްޔަރުކޮށް އޭނާގެ ބަންދާއިމެދު ގޮތެއް ނިންމުމަށް ކްރިމިނަލް ކޯޓަަށް ހާޒިރުކުރުމުން އެ ކޯޓުން އޭނާ ވަނީ މިނިވަންކޮށްފައެވެ. މިއީ ކޯޓުން އޭނާ ދޫކޮށްލި ދެވަނަ ފަހަރެވެ. މިދިޔަ އަހަރުވެސް މިފަދަ މައްސަލައެއްގައި އޭނާ ހައްޔަރުކުރުމުން ކޯޓުން ވަނީ ސޯޝަލް މީޑިއާގައި ދެ މަސް ދުވަސް ވަންދެން ޕޯސްޓު ނުކުރުމަށް ޝަރުތުކޮށް ދޫކޮށްލާފައެވެ. 

އެންމެ ފަހުން ކޯޓުން އޭނާ ދޫކޮށްލާފައިވަނީ އޭނާ ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާ އޮތް ކަމަށް ފުލުހުން ފާހަގަކުރި ނަމަވެސް އޭނާއަށް ތުހުމަތުވާ ކުށުގެ ބާވަތަށް ބަލާއިރު އޭނާގެ ކިބައިން އެހެން މީހަކަށް ގެއްލުމެއް ލިބުމުގެ ފުރުސަތު ނެތް ކަމަށް ބުނުމަށްފަހުގައެވެ.

އަދި އޭނާގެ ފަރާތުން އެހެން މީހަކަށް މިހާތަނަށް ގެއްލުމެއް ލިބިފައިނުވާ ކަމަށާއި، އޭނާއަށް އާންމުންގެ ފަރާތުން ގެއްލުމެއް ލިބުމުގެ އިހުތިމާލު އޮތުމަކީ އޭނާ ބަންދުގައި ބަހައްޓަންޖެހޭ ސަބަބެއް ނޫން ކަމަށްވެސް ކުރިމިނަލް ކޯޓުން ވަނީ ބުނެފައެވެ.