އަންނަ އަހަރުގެ ރިޔާސީ އިންތިހާބުގައި ވާދަކުރައްވާ އެންމެ ރީތި، އެންމެ ސްމާޓް ކެންޑިޑޭޓަކީ އެމްޑީއޭގެ ރައީސް އަހްމަދު ސިޔާމް މުހައްމަދު ކަމަށް އެ ޕާޓީގެ ނައިބު ރައީސް މައުރޫފް ވިދާޅުވެއްޖެއެވެ.
މައުރޫފް މިހެން ވިދާޅުވެފައިވަނީ މިރޭ ސަންގު ޓީވީގެ ހަބަރަށްފަހު ޕްރޮގްރާމުގައި ވާހަކަދައްކަވަމުންނެވެ. މައުރޫފް އިތުރަށް ވިދާޅުވެފައިވަނީ އެމްޑީއޭގެ ރައީސް ޝިޔާމްއަކީ ވަރަށް ޒުވާން ރީތި ބޭފުޅެއް ކަމަށާއި ރީތި ކަމަށްވެސް ވޯޓު ލިބޭ ކަމަށެވެ.
އެގޮތުން 2008 ވަނަ އަހަރުގެ ރިޔާސީ އިންތިހާބުގައި ޑރ. ހަސަން ސައީދަށް 25،000 ވޯޓު ލިބިފައިވަނީ އެބޭފުޅާގެ ރީތިކަމަށް ކަމުގައި މައުރޫފު ވިދާޅުވިއެވެ. އަދި ހަސަން ސައީދަކީ އެއްވެސް ވިޔަފާރިއެއްކޮށް މާލީ ތަނަވަސް ކަމެއް ނެތް ބޭފުޅެއް ކަމަށާއި އެބޭފުޅާ ފާހަގަވެގެން ދިޔައީ ރައީސް މައުމޫނާއި އެކީ ކުޑަދުވަސް ކޮޅެއްގައި އުޅުމުން ކަމަށް މައުރޫފް ވިދާޅުވިއެވެ.
"އަޅުގަނޑު ކައިރި އެތައް އަންހެން ކުދިންނެއް ބުނި ހަސަން ސައީދަށް ވޯޓުދިނީ ރީތިވެގެން ކަމަށް، އަދި އަޅުގަނޑުމެންގެ ރައީސް އަށްވުރެ ސްމާޓް ރީތި ބޭފުޅަކު ނެތް މިއަދު ރިޔާސީ ރޭހަކު"
އެމްޑީއޭގެ ނައިބު ރައީސް މައުރޫފް
އެމްޑީއޭއިން ރަސްމީކޮށް މިހާތަނަށް އެ ޕާޓީގެ ރިޔާސީ ޓިކެޓު ސިޔާމަށް ހަވާލުކޮށްފައިނުވި ނަމަވެސް މި ފަހުން ބޭއްވި އެޕާޓީގެ ކޮންގްރެސްގައި ވަނީ އަންނަ އަހަރުގެ ރިޔާސީ އިންތިހާބުގައި އެ ޕާޓީގެ ޓިކެޓު ސިޔާމަށް ދިނުމަށް ނިންމާފައެވެ.
Advertisement
This content is created and paid for by advertisers and does not involve Voice Journalists
