ރާއްޖެ ޓްރެވަލް ލިންކުގެ މިނީ ބަސް ދަތުރުތަކަށް ޖާގަ ދިނުމަށް އޯކިޑް މަގުގައި ޕާކް ކުރުން މަނާކުރުމުން ބަދަލުގައި ޕާކިން ޒޯނެއް ހެދުމުގެ މަސައްކަތް ފަށައިފިއެވެ. 

މި ޕާކިން ޒޯން ހެދުމުގެ މަސައްކަތް ކުރިއަށްދާކަން އެ މަސައްކަތް ކުރަމުންދާ މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވަނީ ރޭ އިއުލާންކުރައްވާފައެވެ.

މޭޔަރު މުއިއްޒު ކުރެއްވި ޓުވީޓެއްގައި ވިދާޅުވެފައިވަނީ މިނީ ބަސް އޮޕަރޭޝަނަށް އޯކިޑް މަގުގެ ޕާކިން ނަގާ އޭގެ ބަދަލުގައި ޕާކިން ޖާގަ ހަމަޖެއްސުމައްޓަކައި މ. ސްޓާލިންގައި ޕާކިން ޒޯނެއް ހެދުމުގެ މަސައްކަތުގެ ތެރެއިން ކޮންކްރީޓް އެޅުމުގެ މަސައްކަތް މިހާރު ކުރިއަށްދާ ކަމަށެވެ. 

Advertisement

މާލެ ސިޓީގައި މިނީ ބަހުގެ ހިދުމަތް ދޭން ފެށުމާއި ގުޅިގެން ބަސް ދަތުރުކުރާ މަގުތަކުގައި ޕާކް ކުރުން މަނާކޮށް އެ ޖާގަ ތަކުގެ ބަދަލުގައި ޕާކިން ޒޯންތައް ހެދުމުގެ މަސައްކަތް މިވަގުތު ކުރެވެމުންދާކަން ފާހަގަ ކޮށްލެވެއެވެ. އެގޮތުން މި ހަފްތާގެ ތެރޭގައި މަޖީދީ މަގު ހެންވޭރު ދަނޑު ސަރަހައްދުގައި ވަނީ 69 ސައިކަލުގެ ޖާގައިގެ ޕާކިން ޒޯނެއް ހުޅުވާފައެވެ.