ޗެމްޕިއަންސް ލީގުގައި ސްޕެއިންގެ ބާސެލޯނާއިން އަނެއްކާވެސް ޖަރުމަނުގެ ބަޔާން މިއުނިކްގެ އަތްދަށު ވެއްޖެއެވެ.

ޗެމްޕިއަންސް ލީގުގެ ގްރޫޕް ސީގައި ކުޅުނު މި މެޗު ބަޔާން އިން ކާމިޔާބު ކޮށްފައިވަނީ 0-2 ގެ ނަތީޖާއަކުންނެވެ. މިއާއި އެކު އެންމެ ފަހުން ބަޔާން އިން ބާސާއާއި ދެކޮޅަށް ކުޅުނު ހަތަރު މެޗުގައި އެ ޓީމުން ކާމިޔާބުކުރި ގޯލުގެ އަދަދު މިވަނީ 16 އަށް އަރާފައެވެ. މި ހަތަރު މެޗުގައި ބާސާއަށް ޖެހިފައިވަނީ އެންމެ ދެ ގޯލެވެ.

މެޗަށްފަހު ވާހަކަ ދައްކަމުން ބާސެލޯނާގެ ކޯޗު ޒަވީ ބުނެފައިވަނީ މެޗުން ބަލިވި ނަމަވެސް މޮޅަށް ކުޅުނީ އޭނާގެ ޓީމުން ކަމަށެވެ.

Advertisement

ބަޔާންގެ ދަނޑުގައި ކުޅުނު މި މެޗުގެ ފުރަތަމަ ހާފުގައި އެ ޓީމުގެ ފަރާތުން ފެނިގެން ގޮސްފައިވަނީ ދަށް ކުޅުމެކެެވެ. ނަމަވެސް ވަރުގަދަކޮށް މެޗު ފެށި ބާސާއިން ވަނީ ފުލުފުލުގައި ބަޔާންގެ ގޯލަށް އަމާޒުކޮށް ގިނަ ހަމަލާތަކެއް ފޮނުވާލާފައެވެ. ހާއްސަކޮށް މި ސީޒަނަށް ބަޔާން ދޫކޮށް ބާސާއާއި ގުޅުނު ރޮބާޓް ލެވަނޑޮސްކީއަށް ވަނީ މެޗުގެ ފުރަތަމަ ހާފުގައި ހުސް ދެ ފުރުސަތެއް ލިބިފައެވެ. ނަމަވެސް ފުރުސަތުތަކުގެ ބޭނުން ނުހިފި މެޗުގެ ފުރަތަމަ ހާފު ނިމިގެން ގޮސްފައިވަނީ 0-0 ގެ ނަތީޖާއަކުންނެވެ.

މެޗުގެ ދެވަނަ ހާފުގައި ބަޔާން އިން ވަނީ ކުޅުން ރަނގަޅުކޮށް 5 މިނަޓު ތެރޭ ދެ ގޯލުގެ ލީޑެއް ނަގާފައެވެ. ބަޔާންގެ ފުރަތަމަ ގޯލު މެޗުގެ 50 ވަނަ މިނަޓުގައި ކާމިޔާބުކޮށްދީފައިވަނީ ލޫކަސް ހަނާންޑޭޒްއެވެ. ދެވަނަ ގޯލު މެޗުގެ 54 ވަނަ މިނަޓުގައި ކާމިޔާބުކޮށްދީފައިވަނީ ސާނޭއެވެ. 

މި މޮޅާއި އެކު ބަޔާން ވަނީ ކުޅުނު ދެ މެޒު ކާމިޔާބުކޮށް ގުރޫޕުގެ އެއްވަނައިގައި ހަމަޖެހިލާފައެވެ. މި ގުރޫޕުގައި ދެން ހިމެނޭ އިންޓަ މިލާން އަދި ވިކްޓޯރިއާ ޕިޒެން ކުޅުނު މެޗު ކާމިޔާބު ކޮށްފައިވަނީ އިންޓަ މިލާނުންނެވެ. މިރޭގެ މެޗުން ބަލިވި ނަމަވެސް 0-5 އިން ފުރަތަމަ މެޗު ކާމިޔާބުކުރި ބާސާއިން ގްރޫޕުގެ ދެވަނައިގައި އޮތް އިރު ތިން ވަނައިގައި އޮތީ އިންޓަ މިލާންއެވެ.