މޯލްޑިވިއަން ޑިވޮލަޕްމަންޓް އެލަޔަންސް (އެމްޑީއޭ) އިން އަންނަ ޑިސެމްބަރު މަހު ބޮޑު ޖަލްސާއެއް ބާއްވާނެކަން އިއުލާންކޮށްފިއެވެ.
އެމްޑީއޭގެ އަހަރީ ދުވަހާއި ދިމާކޮށް ޑިސެމްބަރު 20 ވަނަ ދުވަހު ބޮޑު ޖަލްސާއެއް ބޭއްވުމަށް ހަމަޖެހިފައިވާކަން އިއުލާން ކުރައްވާފައިވަނީ އެ ޕާޓީގެ ނައިބު ރައީސް އަލީ މައުރޫފްއެވެ. މައުރޫފް މިހެންވިދާޅުވެފައިވަނީ އިއްޔެ ކުރިއަށްދިޔަ އެޕާޓީގެ ގައުމީ މަޖިލީހުގެ ޖަލްސާ ނިންމަވާލެއްވުމަށް ފަހުގައި ނޫސްވެރިންނަށް މައުލޫމާތު ދެއްވަމުންނެވެ.
މައުރޫފް އިތުރަށް ވިދާޅުވެފައިވަނީ އެމްޑީއޭއިން މިވަގުތު މަސައްކަތް ކުރަމުންދާ މައިގަނޑު އަމާޒަކީ ޕާޓީގެ ރައީސް އަށް ރިޔާސީ ޓިކެޓު ހަވާލުކުރާއިރު، ޕާޓީއަށް 30،000 މެންބަރުން ހަމަކުރުން ކަމަށެވެ. އަދި ރިޔާސީ އިންތިހާބަށް ދާއިރު ރާއްޖޭގެ ވަރުގަދަ ޕާޓީއަކަށް އެމްޑީއޭ ހެދުމުގެ އުންމީދުގައި މަސައްކަތް ކުރައްވާ ކަމަށް ވެސް މައުރޫފް ވިދާޅުވިއެވެ.
"މި ފުރުސަތުގައި އަޅުގަނޑު ދަންނަވާލަން ބޭނުންވަނީ އަޅުގަނޑުމެން ދިވެހިރާއްޖޭގެ ތާރީހު ބަދަލުކުރާނަމޭ، މާތް ރަސްކަލާނގެ އިރާދަފުޅާއިއެކީގާ."
އެމްޑީއޭގެ ނައިބު ރައީސް ރައީސް އަލީ މައުރޫފު
މީގެ އިތުރުން ޕާޓީއަށް މެންބަރުން އިތުރުކުރުމަށް ރާއްޖޭގެ ރަށްރަށަށް ޒިޔާރަތް ކުރުމުން ސިޔާމަށް ތާއީދު އޮތް މިންވަރު ހާމަވެގެން ގޮސްފައިވާ ކަމަށާއި އެހެންވެ، ޕާޓީގެ މަސައްކަތްތައް އިތުރަށް ހަރުދަނާ ކުރުމަށް އިތުރު ހިތްވަރެއް ލިބިއްޖެ ކަމަށްވެސް މައުރޫފް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
