ނޫސްވެރިން މަސްދަރު ހާމަކުރުމަށް މަޖުބޫރު ކުރެވޭ ގޮތަށް މިހާރު އޮތް ހެއްކާއި ބެހޭ ގާނޫނު އަލުން އިސްލާހުކުރަން ނިންމަވައިފިން ކަމަށް ރައީސުލް ޖުމްހުރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ. 

ރައީސް ޞާލިހް މިހެން ވިދާޅުވެފައިވަނީ މޯލްޑިވް ބްރޮޑްކާސްޓިން ކޯޕަރޭޝަނުން ބޭއްވި މި އަހަރުގެ މޯލްޑިވްސް ބްރޮޑްކާސްޓިން އެވޯޑްސް ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ. 

ރައީސް ޞާލިހް ވިދާޅުވެފައިވަނީ ނޫސްވެރިކަމަށް ހުރަހެއްގެ ގޮތުގައި އަބުރު ރައްކާތެރި ކުރުމުގެ ނަމުގައި ކުރީގެ ސަރުކާރުން ގެނައި ގާނޫނު އެމަނިކުފާނު ވެރިކަމަށް ވަޑައިގެން އުވާލެއްވި ކަމަށެވެ. އަދި ނިމިދިޔަ ޖުލައި މަހު އެމަނިކުފާނު ތަސްދީގު ކުރެއްވި ހެއްކާއި ބެހޭ ގާނޫނުގެ 136 ވަނަ މާއްދާގެ (ށ) އަށް ގެނެވުނު އިސްލާހާއި މެދު މީޑިއާ ކަންބޮޑުވުމެއް އެބައޮތް ކަމަށާއި އެކަމާއި ބެހޭގޮތުން މީޑިއާގެ ބޭފުޅުންނާއި އެމަނިކުފާނު ބައްދަލުކުރައްވާ މަޝްވަރާ ކުރައްވާފައިވާ ކަމަށްވެސް ރައީސް ޞާލިހް ވަނީ ވިދާޅުވެފައެވެ. 

Advertisement

ހެއްކާބެހޭ ގާނޫނުގެ 136 ވަނަ މާއްދާގެ (ށ) ގައި ބުނެފައިވަނީ ހަސްމަކު ހުށަހަޅާ ހުށަހެޅުމެއްގެ މައްޗަށް ބިނާކޮށް ޝަރީއަތުން ފައިސަލާކޮށް ގޮތެއް ކަނޑައަޅަން ޖެހޭ ކަންކަމުގެ މައްޗަށް ރިއާޔަތް ކުރާއިރު ނޫސްވެރިޔާއަށް މައުލޫމާތު ދިން މީހާއަކީ ކާކުކަން ހާމަކުރުމުގައި އޮތް އާންމު މަސްލަހަތު ބައެއް ހާލަތްތަކަށް ވުރެން ބޮޑު ކަމުގައި ޝަރީއަތަށް ބުރަވެވޭ ނަމަ ނޫސްވެރިޔާ އަށް މައުލޫމާތު ދިން މަސްދަރު ޝަރީއަތަށް ހާމަކުރުމަށް ނޫސްވެރިޔާ އަށް ނުވަތަ އޭނާ ވަޒީފާ އަދާކުރާ ތަނުގެ މައްޗަށް މަޖުބޫރުކުރެވޭނެ ކަމަށެވެ.