ޗެމްޕިއަންސް ލީގުގެ ގްރޫޕް ސްޓޭޖުގައި އެންމެ ފަހުގެ ޗެމްޕިއަނުން ސްޕެއިންގެ ރެއާލް މެޑްރިޑުން އިން ޖަރުމަނުގެ އާރްބީ ލެއިޕްޒުގް ބަލިކޮށް ގްރޫޕްގެ އެއްވަނައިގައި ހަމަޖެހިލައިފިއެވެ.

ރެއާލްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކުރީ 0-2 ގެ ނަތީޖާއަކުންނެވެ. މި މޮޅާއި އެކު މި ސީޒަނުގައި ރެއާލުން ކުޅުނު ހުރިހާ މެޗެއް ކާމިޔާބު ކޮށްފައެވެ. މި ވަގުތު ޔޫރަޕުގައި %100 ގެ މޮޅުވުމުގެ ރެކޯޑެއް އޮތް ހަމައެކަނި ޓީމަކީ ރެއާލް މެޑްރިޑް އެވެ.

މެޗަށްފަހު ވާހަކަ ދައްކަމުން ރެއާލްގެ ކޯޗު ކާލޯ އެންޖެލޯޓީ ބުނެފައިވަނީ ރޭގެ މެޗުގައި އޭނާގެ ޓީމުން ބޮޑަށް ކުޅުނީ ޑިފެންސިވް ކުޅުމެއް ކަމަށާއި ލެއިޕްޒިގެ ފަދަ އެޓޭކިން ރަނގަޅު ޓީމުތަކާއި ދެކޮޅަށް ކުޅެން ޖެހޭނީ އެގޮތަށް ކަމަށެވެ. އަދި އޭނާގެ ކުޅުންތެރިން ކައިރި އޭނާ އަބަދުވެސް ބުނަނީ މެޗުން މޮޅުވުމަށް ކަމަށް އެންޖެލޯޓީ ވަނީ ބުނެފައެވެ.

Advertisement

މި މެޗުގައި ދެ ޓީމުންވެސް ރަނގަޅު ކުޅުމެއް ދައްކާ ރަނގަޅު ފުރުސަތުތަކެއް އުފައްދާފައިވެއެވެ. މެޗުގެ ފުރަތަމަ ގޯލު ފެނިގެން ގޮސްފައިވަނީ މެޗުގެ 80 ވަނަ މިނަޓުގައެވެ. މި ގޯލު ރެއާލް އަށް ކާމިޔާބު ކޮށްދިނީ ފެޑެރިކޯ ވަލްވާޑޭ އެވެ. އެންމެ ފަހުން ސްޕެނިޝް ލަލީގާ ގައި ކުޅުނު މެޗުގައިވެސް ވަލްވާޑޭގެ ރީތި ގޯލެއް ފެނިގެން ގޮސްފައިވެއެވެ.

މެޗުގައި ރެއާލް އިން ޖެހި ދެވަނަ ގޯލު ފެނިގެން ގޮސްފައިވަނީ އިތުރު ވަގުތުގެ ތެރޭގައެވެ. އެ ޓީމަށް މި ގޯލު ޖަހައިދީފައިވަނީ މާކޯ އެސެންސިއޯއެވެ. 

ރެއާލް ހިމެނޭ ގްރޫޕް އެފް ގައި ދެން ހިމެނޭ ދެ ޓީމުކަމަށްވާ ސެލްޓިކް އަދި ޝަކްތަރު ކުޅުނު މެޗު ވަނީ 1-1 އިން އެއްވަރުވެފައެވެ. މި ނަތީޖާތަކާއި އެކު ދެ މެޗުން 6 ޕޮއިންޓާއި އެކު ރެއާލް އޮތީ ގްރޫޕްގެ އެއްވަނައިގައެވެ. ދެވަނައިގައި ދެ މެޗުން ހަތަރު ޕޮއިންޓު ހޯދައިގެން ޝަކްތަރު އޮތް އިރު އެއް ޕޮއިންޓާއި އެކު ތިންވަނައިގައި އޮތީ ސެލްޓިކް އެވެ. ގްރޫޕްގެ ފުލުގައި އޮތީ ދެމެޗުން ވެސް ބަލިވި ލެއިޕްޒިގް އެވެ.