ޑިމޮކްރަސީ ދުވަހާއި ގުޅިގެން އިލެކްޝަން ކޮމިޝަން (އީސީ) އިން ރާއްޖޭގެ ސްކޫލްތަކުގެ ދަރިވަރުންނަށް ކުރެހުމުގެ މުބާރާތެއް ހުޅުވާލައިފި އެވެ.
"ޑިމޮކްރަސީގައި މަގޭ ދައުރު" މި ޝިއާރުގެ ދަށުން ހުޅުވާލާފައިވާ މި ކުރެހުމުގެ މުބާރާތް ޚާއްސަކޮށްފައިވަނީ ގްރޭޑް 7-12 ގެ ދަރިވަރުންނަށެވެ. މިމުބާރާތުުގައި ބައިވެރިވާން ޝައުގުވެރިވާ ދަރިވަރުންނަށް އަންނަ ނޮވެމްބަރުގެ 10 އާ ހަމައަށް ވަނީ ފުރުސަތު ހުޅުވާލާފައެވެ.
މިމުބާރާތުގެ ވަނަވަނަ ހޮވަން ހަމަޖެހިފައިވާއިރު، ވަނަ ހޮވާނީ ކޮންމެ ކީ ސްޓޭޖަކުންނެވެ. އެގޮތުން ކޮންމެ ކީ ސްޓޭޖަކުން 1 ވަނަ، 2 ވަނަ އަދި 3 ވަނަ ހޮވާ އިރު 1 ވަނަ އަށް އަންނަ ދަރިވަރުންނަށް 3000ރ. ލިބޭނެ އެވެ.
އިލެކްޝަންސް ކޮމިޝަނުން ބުނީ މުބާރާތާ ބެހޭ މުހިއްމު މައުލޫމާތުތައް އެތަނުގެ ވެބްސައިޓާއި ފޭސް ބުކް ޕޭޖުން ލިބޭނެ ކަމަށެވެ. އަދި މުބާރާތުގެ އުސޫލުގައިވާ ގޮތުން ކޮންމެ ކީ ސްޓޭޖަކުން 10 ކުރެހުން ހޮވުމަށް ފަހު ސޯޝަލް މީޑިއާ އަށް އެ ކުރެހުންތައް ޕޯސްޓްކުރާނެ އެވެ.
މީގެ އިތުރުން މުބާރާތަށް ކުރެހުންތައް ހުށަހަޅާ ދަރިވަރުންނަށް އިނާމު ދިނުމުގެ އިތުރަށް، ބައިވެރިވާ ކޮންމެ ސްކޫލަކަށް ވެސް ހަނދާނީ ފިލައެއް ދިނުމަށް އީސީން ވަނީ ނިންމާފައެވެ.
Advertisement
This content is created and paid for by advertisers and does not involve Voice Journalists
