އިންޑިއާގެ ޖާސޫސުންތަކެއް ރާއްޖެގެ ވެލާނާ އިންޓަރނޭޝަނަލް އެއަރޕޯޓުން އޯގަސްޓްމަހުގެ 28 ވަނަ ދުވަހުގެ ރޭ އަތުލައިގަނެ ކޯޓަށް ގެންގޮސް އެމީހުންގެ ބަންދުގެ މުއްދަތު ޖަހައި ފުލުހުންގެ ބެލުމުގެ ދަށަށް ގެންދިޔަ ޚަބަރު ރާއްޖޭގެ މީޑިއާތަކުން ފުލުހުންނާ ހަވާލާދީ ރިޕޯޓްކޮށްފައި ވެއެވެ. އޭގެފަހުން މި ޖާސޫސުންނާ ބެހޭ ވާހަކައެއް ނީވެއެވެ.

ފުލުހުން މިކަން ތަހްގީގުކުރަމުންދެއެވެ. ވޮއިސްއަށް އެކިގޮތްގޮތުން ލިބިފައިވާ މައުލޫމާތާއި, ފުލުހުންގެ މަސްދަރުތަކުން ފޯރުކޮށްފީފައިވާ މައުލޫމާތުތަކަށް ބަލާއިރު މިއީ އާދައިގެ މައްސަލައެއް ކަމަކަށް ފުލުހުން ނުބަލައެވެ.

އަތުލައިގަތް ދެމީހުންގެ އަތުން ފެނިފައިވާ ސަމާނުތަކަކީ ދުނިޔޭގެ އެންމެ ކުރިއަރާފައިވާ ޖާސޫސީ އާލާތްތަކެވެ. އެހެންކަމަށްވާނަމަ މިފަދަ އެއްޗެއް އިންޑިއާގެ ޖާސޫސުންތަކެއް ދިވެހި ރާއްޖެއަށް އެތެރެކުރުމުގެ ފަހަތުގައި ކޮންމެވެސް ކަމެއް ހިމެނޭނެއެވެ. 

Advertisement

ހައްޔަރުކުރެވުނު ދެމީހުންނަކީ މިބާވަތުގެ އާލާތްތަކެއް ގެންގުޅެފާނެކަމަށް ހީވެސް ނުކުރެވޭހާ އާދައިގެ ގޮތަކަށް އުޅުނު ބައެކެވެ. ވޮއިސްއަށް ފުލުހުންގެ މަސަދަރުތަކުން މައުލޫމާތު ދިންގޮތުގައި ފުލުހުން އެމީހުންނާ ސުވާލުކުރުމުން ބުނެފައިވަނީ އެމީހުންނަކީ އޭވިއޭޝަން ޓްރޭނިންގ އިންސްޓްރަކްޓަރުން ކަމަށެވެ.  ހައްޔަރުކުރެވުނު ދެމީހުންގެތެރެއިން އެކަކީ އޭގެ މީހެއް ކަމަށެވެ.

ތުހުމަތުކުރެވޭ މީހުންގެ އަތުން ފެނިފައިވާ ސްޕައި ކެމެރާއަކީ އެ އޮންކޮށްލުމުން އިންޓަރނެޓް ކަނެކްޝަން ހެދޭ ފަދަ އާލާތެކެވެ. މާނައަކީ ކެމެރާ ހަރުކޮށްގެން އެމީހުން ކުރާ ކަންކަން އިންޑިއާގައި ނަމަ އެމީހުން ގުޅިފައިވާ ބަޔަކަށް ލައިވްކޮށް ފެންނަމުންދާނެކަމެވެ. ކެމެރާއާއި ގުޅިފައިވާ އެހެން ޑިވައިޒްވެސް ހިމެނެއެވެ. މީގެ ސައިޒު ގަމީހުގެ ގޮށަކަށްވުރެންވެސް ކުޑަކަން ފާަހަގަކޮށްލަން ޖެހެއެވެ.

ކޮންމެއަކަސް ކުރިން ދެންނެވި ފަދައިން މިއީ އިންޑިއާގެ ޖާސޫސީ މިޝަނެއްކަމުގައިވާނަމަ މިމަޝަންގެ ފަހަތުފައިވަނީ ކޮންކަމެއްހެއްޔެވެ. އެއްކަމެއް ހާސިލުވެއްޖެއެވެ. އެއީ ރާއްޖޭގެ އެއަރޕޯޓްގެ ސެކިއުރިޓީ މެޝިންތަކަށް ނާރުވައި މިތަކެތި އެތެރެކުރެވިދާނެކަމެވެ. އެއޮތީ އެތެރެކޮށްފައެވެ. 

ދެން ކޮންކަމެއް ހެއްޔެވެ.

ސިޔާސީ މަސްރަހަށް ބަލާނަމަ ރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވަފްދަކާއެކު ދާދިފަހުން އިންޑިއާއަށް ވަޑައިގެންފިއެވެ. އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނިއުދިއްލީއަށް ގެންދަވައިފިއެވެ. މިނިސްޓަރ ޝާހިދުވެސް ގެންދަވައިފިއެވެ. މިބޭފުޅުންނަކީ އިންޑިއާގެ މަސްލަހަތުތަކަށް ވަރަށް މަތީ ދަރަޖައަކަށް ބައްލަވާ ބޭފުޅުންކަމަށް ރާއްޖޭގައި އަޑުފެތުރިފައި އޮވެއެވެ. ރާއްޖޭގެ ސަލާމަތީ އިދާރާތަކުން އޮތް ހުރަހެއް ފެންނާކަށެއް ނެތެވެ. އެހެންވީމާ ކޮންކަމެއް ހެއްޔެވެ?

ވިސްނާލީމާ ޖާސޫސީ ޓީމެއް ފޮނުވައިގެން ބަލަން އޮތީ އެންމެ ކަމެއްހޭ ބުނެވިދާނެއެވެ. އެއީ ކުރިއަށް އޮތް ރިޔާސީ އިންތިޚާބު ކާމިޔާބު ކުރާނެ މީހެކެވެ. އެމީހަކަށް ފާރަލައި ބެލުމެވެ. ފާރަލާންވީ ކޮންކަމަކާ ހެއްޔެވެ?

އިދިކޮޅު ކެންޑިޑޭޓެއްގެގޮތުގައި މިހާރު ފެންނަންހުރި ކުރީގެ ރައީސް ޔާމީން، އެމަނިކުފާނުގެ ގެކޮޅުން ޕާޓީ އޮފީހަށް ވަޑައިގަންނަވަން އެދެމެދުގައިވާ ސަތޭކަ ވަރަކަށް ފޫޓް ހުރަސްކުރައްވަނީ ސެކިއުރިޓީ ކާރުކޮޅުގައި ސިފައިންގެ ދެމީހުން ދެފަރާތުގައި ތިބެގެންނެވެ.

ކޮންމެވެސް ސަބަބަކާހެދި އެމަނިކުފާނަށް އޮތް ތްރެޓްލެވެލް ސިފައިން މައްޗަށް ޖައްސައިގެން އުޅެނީކަމަށް ވެދާނެއެވެ.

ރައީސް ޔާމީނަކީ މިފަހަރު ރިޔާސީ އިންތިޚާބު ކާމިޔާބުކުރައްވާނެކަމަށް އެންމެ ބޮޑަށް އަޑުއަރަމުންދާ ބޭފުޅާއެވެ.

މިޖާސޫސީ މީހުންނާގުޅޭ އެހެން ވާހަކައެއްވެސް އިވެއެވެ.

އެމީހުންނަކީ ރާއްޖެއަށް ޒިޔާރަތްކުރާ ކޮންމެވެސް ޕްރައިވެޓް ބައެއްގެ މަންޒަރުތައް ސިއްރުން ވީޑިއޯކުރަން ފޮނުވައިގެން އުޅޭ ބައެއްކަމަށްވެސް އަޑުއިވެއެވެ. އާއްމުކޮށް އިންޑިއާގެ މީޑިއާތަކުން އެންމެ ފޯރިހުންނަ އެކައްޗަކަށް މަޝްހޫރު ފިލްމް ސްޓާރުން ބިކިނީގައި އުޅޭމަންޒަރު ސިއްރުން ވީޑިއޯކޮށްގެން ދެއްކުން އޮވެއެވެ.

ކޮންމެއަކަސް މިއީ ޖާސޫސްކުރާ ސާމާނުތަކަކާއެކު ފުލުހުންގެ ބެލުމުގެ ދަށަށް ބަޔަކު ގެންގޮސް ކޯޓް އަމުރެއްގެ ދަށުން ހިފަހައްޓައިގެން އުޅޭ މައްސަލައަކަށްވާތީ ސީރިއަސް މައްސަލައެއްކަމަށް ބަލަންޖެހެއެވެ.

ދިވެހި ރާއްޖެއަކީ ދުނިޔޭގެ ބޮޑެތި ވިޔަފާރި ވެރިން އިންވެސްޓްކުރަން އަންނަ ގައުމަކަށްވާއިރު ރާއްޖެއަކީ ރައްކާތެރި ތަނެއްގެ ގޮތުގައި ދަމަހައްޓަންޖެހެއެވެ.