ނޫސްވެރިންގެ ކަންބޮޑުވުންތައް ހައްލުކުރުމަށް ގާނޫނު އިސްލާހު ކުރާތީ މޯލްޑިވްސް މީޑިއާ ކައުންސިލުން މަރުހަބާ ކިޔައިފިއެވެ.

އެމްއެމްސީން މިއަދު ނެރުނު ނޫސް ބަޔާނެއްގައި ބުނީ ހެއްކާ ބެހޭ ބިލުގެ 136 ވަނަ މާއްދާއަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 28 ވަނަ މާއްދާއިން ކަށަވަރުކޮށްދީފައިވާ ނޫސްވެރިކަމުގެ މިނިވަންކަމުގެ ޙައްޤަށް އުނިކަން ލިބޭނެހެން، ނޫސްވެރިޔާގެ މަސްދަރު ހާމަކުރުމަށް މަޖުބޫރުކުރުވާ މާއްދާއެއް ކަމުގައިވާތީ، މި ކައުންސިލާއި، ރާއްޖޭގެ ހުރިހާ ނޫސްވެރިންނާއި މީޑިއާގެ ކަންބޮޑުވުން އޮތް މާއްދާއެކެވެ. އެހެންކަމުން ހެއްކާ ބެހޭ ބިލުގެ 136 ވަނަ މާއްދާ އުނިކޮށްދެއްވުން އެދި ކަމާ ބެހޭ ހުރިހާ މުއައްސަސާއެއްގައި އެ ކައުންސިލުން އެދިފައިވާނެ ކަމަށެވެ.

ހެއްކާ ބެހޭ ގާނޫނު އިސްލާހު ކުރަން އެދިފައި ވަނިކޮށް ރޭ ބޭއްވި "މޯލްޑިވްސް ބްރޯޑްކާސްޓް އެވޯޑް" ހަފްލާ ޝަރަފްވެރިކޮށް ދެއްވައި ރައީސް އިބްރާހިމް މުހައްމަދު ސާލިހު ވިދާޅުވީ ނޫސްވެރިންގެ ކަންބޮޑުވުންތައް ހައްލުކުރުމަށް ހެއްކާ ބެހޭ ގާނޫނު އިސްލާހު ކުރަން ނިންމާފައިވާ ކަމަށެވެ.

ރައީސްގެ ވާހަކަފުޅުގައި ނޫސްވެރިކަމަށް ޤާނޫނީ ހުރަހެއްގެ ގޮތުގައި ކުރިން، "އަބުރު ރައްކާތެރިކުރުމުގެ ނަމުގައި" އޮތް ޤާނޫނު މި ސަރުކާރުން އުވާލައްވައި ނޫސްވެރިންނަށް މިކަމުގައި އޮތް ކަނބޮޑުވުން ވެސް ޙައްލުކޮށްދެއްވާފައިވާކަން ފާހަގަކުރެއްވިއެވެ.

އަދި އެބިލާއި ގުޅިގެން ނޫސްވެރިންގެ ހުރި ކަންބޮޑުވުންތަކަށް ޙައްލު ހޯއްދަވައިދެއްވުމަށް އެ ޤާނޫނު އަލުން އިޞްލާހުކުރެއްވުމަށް ނިންމަވާފައިވާކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ވިދާޅުވުމީ އެކައުންސިލުން ނުހަނު އުފާކޮށް އެކަމަށް މަރުހަބާ ދަންނަވާ ކަމެއް ކަމަށްވެސް ނޫސް ބަޔާނުގައި ބުނެފައިވެއެވެ.