ނުކުޅެދުންތެރިކަން ހުންނަ ފަރާތްތަކަށް ދެމުންދާ އެލެވެންސް ބޮޑުކުރުމާއި ދެކޮޅު ހެދުމުން ބްލައިންޑް އެންޑް ވިސުއަލީ އިމްޕެއަރޑް ސޮސައިޓީ އޮފް މޯލްޑިވްސް (ބީވީއައިއެސްއެމް) އިން ކަންބޮޑުވުން ފާޅުކޮށްފިއެވެ.
ބީވީއައިއެސްއެމް މިކަމާއި ގުޅިގެން ނެރުނު ނޫސްބަޔާނެއްގައި ބުނެފައިވަނީ މިހާރު ނުކުޅެދޭ ފަރާތްތަކަށް ގާނޫނުގެ ދަށުން ދެމުން އަންނަ 2،000 ރުފިޔާގެ އެލެވެންސަކީ ހިދުމަތްތަކާއި ތަކެތީގެ އަގުތަކަށް އައިސްފައިވާ ބަދަލުތަކަށް ބަލާއިރު އެކަށީގެންވާ މިންވަރެއް ކަމުގައި އެ ޖަމްއިއްޔާއިން ނުދެކޭ ކަމަށެވެ.
މީގެއިތުރުން މި އެލަވެންސަށް ހެޔޮބަދަލެއް ގެނެވޭތޯ އެ ޖަމްއިއްޔާއިން ކެނޑިނޭޅި މަސައްކަތް ކުރަމުންދާ ކަމަށާއި މި ހެޔޮބަދަލަކީ ނުކުޅެދުންތެރިކަން ހުންނަ ފަރާތްތަކާއި އެފަރާތްތަކުގެ އާއިލާ ތަކުން އާދޭހާއި އެކު އެދެމުންދާ ކަމެއް ކަމަށްވެސް ބީވީއައިއެސްއެމް ގެ ބަޔާނުގައި ބުނެފައިވެއެވެ.
އަދި މި އެލަވަންސަށް ހެޔޮބަދަލެއް ގެނެސްދެއްވާނެ ކަމުގެ އިޝާރާތެއް ރައިސުލްޖުމްހުރިއްޔާ އިބްރާހިމް މުހައްމަދު ޞާލިހް ދެއްވާފައިވާ މި ދަނޑިވަޅުގައި މި އެލަވެންސް ބޮޑުކުރުމަކީ މުހިންމުކަމެއް ނޫންކަމަށް ދޭހަވާފަދަ ގޮތަކަށް، ނުކުޅެދުންތެރިކަން ހުންނަ ފަރާތްތަކާއި ގުޅުންހުރި ބައެއް ފަރާތްތަކުން ދެކެވޭ ވާހަކަ ތަކާއި މެދު އެ ޖަމްއިއްޔާއިން ނުހަނު ކަންބޮޑުވާ ކަމަށްވެސް ބީވީއައިއެސްއެމް ގެ ބަޔާނުގައި ބުނެފައިވެއެވެ.
ބީވީއައިއެސްއެމް އިން މިފަދަ ބަޔާނެއް ނެރެފައިވާއިރު މޯލްޑިވްސް އެސޯސިއޭޝަން އޮފް ޕާސަންސް ވިތު ޑިސްއެބިލިޓީސް (އެމްއޭޕީޑީ) ވަނީ ނުކުޅުދުންތެރިކަން ހުންނަ ފަރާތްތަކަށް ދޭ އެލެވެންސް ބޮޑު ކޮށްގެން ދިގު މުއްދަތަކަށް އެކަން ދެމެހެއްޓޭނެ ކަމަށް ގަބޫލު ނުކުރާ ކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists
