ޔޫރަޕާ ލީގު ގެ ގްރޫޕް އީ ގައި ކުޅުނު މެޗުގައި މޮލްޑޯވާގެ އެފްސީ ޝެރިފް ބަލިކޮށް އިނގިރޭސިވިލާތުގެ މެންޗެސްޓާ ޔުނައިޓެޑުން ގްރޫޕުގައި ހަމަޖެހިލައިފިއެވެ.

މެންޗެސްޓާ ޔުނައިޓެޑުން މިރޭގެ މެޗަށް ނުކުތީ މުބާރާތުގައި ކުޅުނު ފުރަތަމަ މެޗުން އަމިއްލަ ދަނޑުގައި ސްޕެއިންގެ ރެއާލް ސްސެޑައިޑާއި ކުޅުނު މެޗުން ބަލިވެ ނުތަނަވަސް ކަމެއްގެ ތެރޭގައި އޮވެއެވެ. ނަމަވެސް އެ މެޗަށްފަހު ޕްރިމިއާ ލީގުގައި ކުޅެން އޮތް މެޗު ކެންސަލް ވުމާއި އެކު ޝެރިފް އާއި ދެކޮޅަށް ނުކުތުމުގެ ކުރިން ތައްޔާރުވުމަށް އެ ޓީމަށް ލިބުނު ދުވަސްތަކުގެ ބޭނުން ހިފައިފާވާކަން މި މެޗުން ފެނިގެން ގޮސްފައިވެއެވެ.

މެޗަށްފަހު ވާހަކަ ދައްކަމުން މެންޗެސްޓާ ޔުނައިޓެޑުގެ ކޯޗު އެރިކް ޓެން ހާގް ބުނެފައިވަނީ މެޗު ފެށުނު ކޮޅު އުނދަގޫވި ކަމަށާއި ނަމަވެސް އޭނާގެ ކުޅުންތެރިން ވަނީ ފަހުން ކުޅުން ރަނގަޅުކޮށް ލީޑު ނަގާފައި ކަމަށެވެ. 

Advertisement

އިނގިރޭސި ރާނީ އަވަހާރަވުމާއި ގުޅިގެން ޕްރިމިއާ ލީގުގައި އަންނަ ހަފްތާގައި ޔުނައިޓެޑު ކުޅެން އޮތް މެޗުވެސް ކެންސަލް ވުމާއި އެކު ދެން އެ ޓީމުން ނިކުންނާނީ ވާދަވެރި މެންޗެސްޓާ ސިޓީއާއި ދެކޮޅަށް އަންނަ މަހުގެ ދެވަނަ ދުވަހުއެވެ.

މި މެޗުގައި މެންޗެސްޓާ ޔުނައިޓެޑުން ވަނީ ގިނަ ވަގުތު ބޯޅަ ހިފަހައްޓާ ތަފާތު ކުޅުމެއް ދައްކާފައެވެ. އެގޮތުން ޔުނައިޓެޑުގެ މެދުތެރެއަށް ކުޅޭ ޑެންމާކްގެ އެރިކްސަން ވަނީ މި މެޗުގައި ތަފާތު ކުޅުމެއް ދައްކާފައެވެ. މެޗުގެ 17 ވަނަ މިނަޓުގައި ޖޭޑަން ސަންޗޯ ޔުނައިޓެޑަށް ލީޑު ނަގައިދިން އިރު މެޗުގެ 39 ވަނަ މިނަޓުގައި ލިބުނު ޕެނަލްޓީއަކުން ޔުނައިޓެޑުގެ ލީޑު ފުޅާކޮށްދީފައިވަނީ ކްރިސްޓިއާނޯ ރޮނާލްޑޯއެވެ. މިއީ މި ސީޒަނުގައި ރޮނާލްޑޯ ކާމިޔާބުކުރި ފުރަތަމަ ގޯލެވެ. 

ގްރޫޕް އީ ގައި ދެން ހިމެނޭ ދެ ޓީމު ކަމަށްވާ ރެއާލް ސޮސައިޑެޑް އަދި އޮމޯނިއާ ކުޅުނު މެޗު ސޮސައިޑެޑް އިން ކާމިޔާބު ކޮށްފައިވަނީ 1-2 ގެ ނަތީޖާއަކުންނެވެ. މިއާއި އެކު މި ގްރޫޕްގެ އެއްވަނައިގައި ދެ މެޗު ކާމިޔާބުކޮށްގެން ސޮސައިޑެޑް އޮތް އިރު ޔުނައިޓެޑް އަދި ޝެރިފް އަށްވެސް ލިބިފައިވަނީ ތިން ޕޮއިންޓެވެ. ގްރޫޕްގެ ފުލުގައި ދެ މެޗުން ބަލިވެގެން އޮތީ އޮމޯނިއާ އެވެ.