ކުޑަކުދިންގެ އަދުލުގެ ގާނޫނުގެ ދަށުން އުފައްދަން ލާޒިމްކުރާ ޖުވެނައިލް ރެޒިޑެންޝަލް ޓްރީޓްމެންޓް ސެންޓަރ ކޮޅުމަޑުލު ވޭމަންޑޫގައި ހުޅުވައިފިއެވެ.

މި ސެންޓަރު ހުޅުވާފައިވަނީ އެކަމަށްޓަކައި ވޭމަންޑޫގައި ބޭއްވި ޚާއްސަ ރަސްމިއްޔާތެއްގައި ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރެވެ.

މި ސެންޓަރު ހުޅުއްވައި ދެއްވުމަށްފަހު ވާހަކަ ދައްކަވަމުން އަލީ ނަޒީރު ވިދާޅުވީ، ރާއްޖޭގައި ހަވާސާވަމުން އަންނަ ކުޑަކުދިން އެކި މައްސަލަތައް ހައްލުކުރުމަށް އެކުލަވާލާފައިވާ އަދުލުގެ ގާނޫނުގެ ދަށުން ކުރެވޭ އެންމެ މުހިންމު ކަމަކީ އެކުދިންގެ މައްޗަށް ގާނޫނު ތަންފީޒުކުރަން ޖެހޭ ހާލަތަށް ނުދިއުމަށްޓަކައި އެފަދަ ސެންޓަރެއް ހުޅުވުން ކަމަށެވެ. އަދި މިއީ އެކަމުގެ ފެށުން ކަމަށްވެސް ނަޒީރު ވިދާޅުވިއެވެ.

Advertisement

ޖުވެނައިލް ރެޒިޑެންޝަލް ޓްރީޓްމެންޓު ސެންޓަރަކީ ކުޑަކުދިން ކުށްތަކަށް އަރައިގަންނަ މިންވަރު މަދުކުރުމަށް ދިގު މުއްދަތަކަށް ނުވަތަ ކުރު މުއްދަތަކަށް އެކަހެރިކޮށްގެން އިސްލާހުކޮށް ފަރުވާދޭން ޖެހިއްޖެ ހާލަތެއްގައި އެތަނުގައި ބައިތިއްބައިގެން ފަރުވާ ދެވޭނެ ސެންޓަރެކެވެ. 

މި ސެންޓަރުގައި ތިބޭ ކޮންމެ ކުއްޖަކަށްވެސް އެކުއްޖާގެ އުމުރާއި ފެންވަރާއި ގާބިލިއްޔަތާ އެކަށީގެންވާ ތައުލީމާއި ތަމްރީނާއި ހުނަރުތައް ފޯރުކޮށްދެވޭނެއެވެ.