އިސްލާމީ މަރުކަޒުގެ ގޯތިތެރެއަށް ބޮޑު ކަމުދިޔަ އިންޑިއާ މީހާގެ މައްސަލަ ބެލުމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ގޮވާލައްވައިފިއެވެ. 

ޑރ މުއިއްޒު މިފަދައިން ގޮވާލައްވާފައިވަނީ އިސްލާމީ މަރުކަޒުގެ ގޯތިތެރެއަށް އިންޑިއާ މީހަކު ބޮޑުކަމު ދިޔަ މައްސަލައެއް "ވޮއިސް" ނޫހުން ރިޕޯޓުކުރުމާއި ގުޅިގެން ކުރެއްވި ޓްވީޓެއްގައެވެ. 

އެ ޓްވީޓުގައި ޑރ. މުއިއްޒު ވިދާޅުވީ މިސްކިތަށް ކުޑަކަމު ގޮސް، ބޮޑުކަމުގޮސް، މިސްކިތުގެ ހުރުމަތް ކަނޑާ ކޮންމެ މީހަކީ ސިކުނޑި ހަމަނުޖެހޭ މީހަކަށް ހެދުމަށްފަހު އެމީހާއާއި ދޭތެރޭގައި ފިޔަވަޅު ނާޅާ ދޫކޮށްލުމަކީ ބަލައިގަނެވޭނެ ކަމެއް ނޫންކަމަށެވެ. 

އަދި މިސްކިތްތަކުގެ ހުރުމަތް ކެނޑުން ނިނުމަކަށް ގެނައުމަށް، އެފަދަ ކަންތައްތައް ކުރާ މީހުންނާއި ދޭތެރޭ ހަރުކަށި ފިޔަވަޅު އެޅުމަށް މޭޔަރު ވަނީ ގޮވާލައްވާފައެވެ. 

އިސްލާމީ މަރުކަޒަށް ބޮޑުކަމު ދިޔަ މައްސަލައެއް ފެންމަތވެފައިވާއިރު، މީގެ ކުރިންވެސް ވަނީ މިފަދަ ގިނަ މައްސަލަތަކެއް ފެންމަތިވެފައެވެ.

އެގޮތުން މިސްކިތަށް ކުޑަކަމު ދިޔަ މައްސަލައަކާއި، ހަތިމަށް ކުޅު ޖެހި މައްސަލައެއްގެ އިތުރުން ބަރަހަނާ ހާލުގައި މިސްކިތަށް ބިދޭސީއަކު ވަތް މައްސަލައެއްވެސް ވަނީ ފެންމަތިވެފައެވެ. 

އެހެން ނަމަވެސް މިފަދަ ކޮންމެ މައްސަލައެއްގައި އެކަމުގައި ޝާމިލުވާ ފަރާތް ހައްޔަރުކުރުމަށްފަހު އެއީ ސިކުނޑީގެ މައްސަލައެއް ހުންނަ މީހެއްކަމަށް ހަދާ ފުލުހުން އެމީހާ ދޫކޮށްލައެވެ. 

އެފަދަ ކަންކަން އިތުރުވަމުން ދާތީ، މާލޭ ސިޓީ ކައުންސލުން ވަނީ މާލޭގެ މިސްކިތްތަކުގެ ސަލާމަތާއި ރައްކާތެރިކަން ކަށަވަރުކުރުމަށް ސީސީޓީވީ ހަރުކޮށް، އެ ނިޒާމުގެ ތެރެއިން މިސްކިތްތައް ބެލެހެއްޓުމުގެ މަސައްކަތްވެސް ފަށާފައެވެ.