ބުރާސްފަތި ދުވަހުގެ ރޭ ފުލުހުން ޑްރިފްޓް ކުރުމަށް ހުރަސް އަޅާކަމަށް ބުނެ މޯލްޑިވްސް ޑްރިފްޓް އެސޯސިއޭޝަނުން ބޭއްވި އެއްވުމާއި ރޭސިން އެސޯސިއޭޝަން އޮފް މޯލްޑިވްސް (ރޭމް) އިން ދެކޮޅު ހަދައިފިއެވެ.

ރޭމް އިން ނެރުނު ނޫސް ބަޔާނެއްގައި ބުނެފައިވަނީ ބުރާސްފަތި ދުވަހުގެރޭ ހުޅުމާލެގައި ހިނގާދިޔައީ މިހާރު ރާއްޖޭގައި މޮޓޯ ސްޕޯޓްސް އަށް ލޯބިކުރާނެ ބަޔަކު ހިންގާނެ ހަރަކާތެއް ނޫން ކަމަށާއި، މޮޓޯ ސްޕޯޓްސް ވަނީ ހުރިހާ ސަރުކާރަކުންވެސް ބަލައިގަނެ އެ ކުޅިވަރު ކުރިއެރުވުމަށް އެހީތެރިވެފައި ކަމަށެވެ. 

މީގެ އިތުރުން ރޭމް ގެ ބަޔާނުގައި ބުނެފައިވަނީ މޮޓޯ ސްޕޯޓްސްއަށް އެތަކެއް އެހީތެރިކަމެއް ވެދޭ ފުލުހުންނާއި އެ ކުޅިވަރަށް ލޯބިކުރާ ބަޔަކު ކުރިމަތި ނުލާނެ ކަމަށެވެ. އަދި ދަންވަރު ވަގުތަކީ ކުޅިވަރު ކުރިއެރުވުމަށް ރަނގަޅު ވަގުތެއް ނޫންކަމަށާއި އެކަން އެގޮތަށް ކުރުމުން ޒުވާނުންނަށް މަގުތަކުގެ ގާނޫނު ތަކުގެ މަތިން ހަދާންނެތި އެ ކުޅިވަރުގެ ހަމައިން ނެއްޓި ބާރު ސްޕީޑުގައި ދުއްވުން އިތުރުވާ ކަމަށްވެސް ރޭމް އިން ވަނީ ބުނެފައެވެ. 

Advertisement

އަދި ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ރޭމް އަށް ރޭސް ޖެހުމަށް ހުއްދަ ދެވިފައިވާ ވަގުތު ތަކުގެ ތެރެއިން ކޮންމެ ހުކުރު ދުވަހެއްގެ 2:00 އިން 6:00 އަށް ޑްރިފްޓް އެސޯސިއޭޝަން އަށް ވަގުތު ދީފައިވާނެ ކަމަށްވެސް ރޭމްއިން ވަނީ ބުނެފައެވެ. އަދި އެ ވަގުތު ތަކުގައި ޑްރިފްޓް އެސޯސިއޭޝަންގެ ހަރަކާތްތަކަށް ފުލުހުން ހުރަސް ނާޅާނެ ކަމަށްވެސް ރޭމްއިން ވަނީ ބުނެފައެވެ.  

ޑްރިފްޓް އެސޯސިއޭޝަންގެ އޮފިޝަލަކު "ވޮއިސް" އަށް މައުލޫމާތު ދިން ގޮތުގައި ބުރާސްފަތި ދުވަހުގެ ރޭ ބޭއްވުނު އެއްވުމަކީ އެ ފަރާތުން އެޗްޑީސީ އިން ހުއްދަ ނަގައިގެން ހިންގާ "ތާޒްޑޭ ނައިޓް" ބޭއްވުމަށް ފުލުހުން ހުރަސްއަޅާ މަގު ހުސްކުރުމަށް އެންގުމުން އެއްވި އެއްވުމެއް ކަމަށެވެ.