އިންޑިއާއިން ރާއްޖޭަގައި ހިންގާ ކުދި ޕްރޮޖެކްޓުތައް މާ ރަނގަޅު ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

އައްޑޫސިޓީއަށް މިހާރު ކުރައްވަމުން ގެންދަވާ ދަތުރުފުޅުގެ ފޮޓޯތައް ހިއްސާކުރައްވައި އެމަނިކުފާނުގެ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އިންޑިއާ އިން އައްޑޫ ސިޓީގައި ކުރިއަށް ގެންދާ ޑްރަގް ޑިޓޮކްސް ސެންޓަރާއި، ގޭދޮށު މަސް ފެކްޓްރީ އާއި ގެސްޓްހައުސް ޓޫރިޒަމްގެ މަސައްކަތް ކުރަމުން އަންނަ ތަންތަނަށް މިދިޔަ ދެދުވަހު ޒިޔާރަތް ކުރެއްވި ކަމަށާއި، އެތަންތަނުގެ ސަބަބުން އައްޑޫ ސިޓީ ރައްޔިތުންނަށް ވަރަށް ބޮޑެތި ފައިދާތައް ލިބެމުންދާ ކަމަށެވެ.

އެމަނިކުފާނުގެ މި ޕޯސްޓުގައި އައްޑޫ ސިޓީއަށް އިންޑިއާއިން ކުރައްވަމުން ގެންދަވާ ބައެއް މަޝްރޫޢުތަކުގެ ފޮޮޓޯ ހިއްސާކުރައްވަމުން ވަނީ އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރަށް ޝުކުރު އަދާކުރައްވާފައެވެ.

Advertisement

އައްޑޫ ސިޓީއަށް މިހާރު ކުރައްވަމުން ގެންދަވާ ދަތުރުފުޅުގައި އެރަށަށް ވަޑައިގެން އެރަށު އެމްޑީޕީގެ މެންބަރުންނާއި އެކު ބޭއްވި ބައްދަލުވުމެއްގައި ވިދާޅުވެފައިވަނީ ޒަމާނުއްސުރެން ވެރިން އައްޑޫ ސިޓީއާ މެދު ހިތާފައިވަނީ ވަރަށް ގޯސްކޮށް ކަމަށާއި، މި ސަރުކާރަށް ރައްޔިތުންގެ ތާއީދާއި އިތުބާރު ހޯދުމަށް އައްޑޫ ތަރައްގީކުރަންޖެހޭ ކަމަށްވެސް އެމަނިކުފާނު ވިދާޅުވިއެވެ.

އަދި ސަރުކާރުން އައްޑޫއަށް ގިނަ ކަންތައްތަކެއް ކޮށްފިނަމަ ސަރުކާރަށް މިހާރަށް ވުރެ އިތުރަށް ތާއީދު އިތުރުވާނެކަމަށްވެސް ރައީސް ނަޝީދު ވަނީ ވިދާޅުވެފައެވެ.