ޕްރިމިއާ ލީގުގައި އެންމެ ފަހުގެ ޗެމްޕިއަނުން މެންޗެސްޓާ ސިޓީއިން 0-3 ގެ ނަތީޖާއަކުން ވުލްވްސް ބަލިކޮށް ތާވަލުގެ އެއްވަނަ އަށް ޖެހިލައިފިއެވެ. 

މިހާތަނަށް މި ސީޒަނުގައި ސިޓީއިން ލީގުގައި ބަލިވެފައި ނުވާއިރު، އެ ޓީމުން ވަނީ ކުޅުނު 7 މެޗުގެ ތެރެއިން 5 މެޗު ކާމިޔާބުކޮށްފައެެވެ. ނަމަވެސް ސިޓީއަށް އެއްވަނައިގައި ހަމަޖެހިލުމުގެ ފުރުސަތު ލިބޭނީ އާސެނަލް އާއި ބްރެންޓްފޯޑް ބައްދަލުކުރާ މެޗުގެ ނަތީޖާ ނިކުންނަ ގޮތަކުންނެވެ. އެގޮތުން އާސެނަލް މޮޅުވެއްޖެ ނަމަ އެ ޓީމުން އެއްވަނަ އަށް އަރާ އިރު އާސެނަލް އެއްވަރުވެ ނުވަތަ ބަލިވެއްޖެ ނަމަ ސިޓީ އެއްވަނައިގައި ދެމި އޮންނާނެއެވެ. 

ވުލްވްސްގެ ދަނޑުގައި ކުޅުނު މި މެޗުގެ ފުރަތަމަ މިނަޓުގައި ސިޓީއިން ވަނީ ލީޑު ނަގާފައެވެ. އެގޮތުން އެ ޓީމުން ކުރި ފުރަތަމަ އެޓޭކުގައި މި ގޯލު ކާމިޔާބު ކޮށްދީފައިވަނީ ޖެކް ގްރީލިޝްއެވެ. މި ފަހުން ގްރީލިޝް ގެ ފަރާތުން ގޯލެއް ނުފެނި ގިނަ ދުވަސްތަކެއް ވެފައިވާތީ އޭނާއަށް ގިނަ ފާޑުކިޔުންތަކެއް އަމާޒުވެފައިވާކަންވެސް ފާހަގަ ކޮށްލެވެއެވެ.

މެޗަށްފަހު ވާހަކަ ދައްކަމުން ގްރީލިޝް ބުނެފައިވަނީ ގޯލު ނުޖެހުމުން އޭނާއަށް ކުރިމަތިވާ ފާޑުކިޔުންތަކަށް އޭނާ ގަބޫލު ކުރާ ކަމަށާއި އޭނާއަށް މިއަށްވުރެ ގިނައިން ގޯލު ޖެހެން ޖެހޭނެ ކަމަށެވެ.

ސިޓީއިން ވަނީ މެޗުގެ 16 ވަނަ މިނަޓުގައި ލީޑު ފުޅާކޮށްފައެވެ. މި ގޯލު އެ ޓީމަށް ކާމިޔާބު ކޮށްދިނީ މި ސީޒަނުގައި އެ ޓީމުގައި އެންމެ މޮޅު ކުޅުމެއް ދައްކަމުން އަންނަ އާލިން ހާލަންޑެވެ. މިއީ ހާލަންޑު މިހާތަނަށް ކުޅުނު 7 ލީގު މެޗުގައި ޖަހައިދިން 11 ވަނަ ގޯލެވެ. ސިޓީގެ ފަހު ގޯލު މެޗުގެ ދެވަނަ ހާފުގައި އެ ޓީމަށް ކާމިޔާބު ކޮށްދިނީ ފިލް ފޯޑެން އެވެ. 

މެޗުގެ 33 ވަނަ މިނަޓުގައި ވުލްވްސްގެ ނެތަން ކޮލިންސް ކުރި ނުރައްކާތެރި ފައުލަކާއި ގުޅިގެން ރެފްރީ ވަނީ އޭނާއަށް ރަތް ކާޑު ދައްކާފައެވެ. 

ސިޓީއިން ދެން ލީގުގައި ނުކުންނާނީ އެ ޓީމާއި އެންމެ ވާދަވެރި މެންޗެސްޓާ ޔުނައިޓެޑާއި ދެކޮޅަށެވެ.