ސްޕެނިޝް ލަލީގާގައި އެލްޗޭ އަތުން ބާސެލޯނާއަށް ފަސޭހަ މޮޅެއް ލިބިއްޖެއެވެ.
ބާސާގެ ދަނޑުގައި ކުޅުނު މި މެޗު އެ ޓީމުން ކާމިޔާބު ކޮށްފައިވަނީ 0-3 ގެ ނަތީޖާއަކުންނެވެ. މި ސީޒަނުގެ ލަލީގާގައި މިހާތަނަށް ބާސާއިން ކުޅުނު އެއްވެސް މެޗަކުން ބަލިވެފައި ނުވާއިރު ކުޅުނު 6 މެޗުގެ ތެރެއިން 5 މެޗު އެ ޓީމުން ވަނީ ކާމިޔާބު ކޮށްފައެވެ. މިވަގުތު ތާވަލުގެ އެއްވަނައިގައި އޮތް ބާސާއަށް ރެއާލް އަދި އެތުލެޓިކޯ ކުޅޭ މެޗު އެތުލެޓިކޯއިން ކާމިޔާބު ކޮށްފި ނަމަ އެ މަގާމުގައި ދެމި އޮތުމުގެ އަމިއްލަ ބާރު ލިބިގެން ދާނެއެވެ.
ބާސާގެ ދަނޑުގައި ކުޅުނު މެޗުގައި އެ ޓީމުން ވަނީ މި ސީޒަނުގައި އެ ޓީމުން ދައްކަމުންދާ ތަފާތު ކުޅުން ތަކުރާރުކޮށްފައެވެ. މެޗުގެ ކުޅުމުގެ ތެރެއަށް ދެ ޓީމަށްވެސް ކޮންޓްރޯލް ނުލިބެނީސް އެލްޗޭގެ ޑިފެންޑަރު ވަރްޑޫ ކުރި ފައުލަކަށް ވަނީ ރަތް ކާޑެއް ދައްކާފައެވެ. މެޗުގެ ކޮންޓްރޯލް ބާސާއިން ނަގާފައިވަނީ މިހިސާބުންނެވެ.
މެޗުގައި ބާސެލޯނާއަށް ލީޑު ނަގައިދީފައިވަނީ މި ސީޒަނުގެ ލަލީގާގައި އެންމެ ގިނަ ގޯލު ޖަހާފައިވާ ރޮބާޓް ލެވަންޑޮސްކީއެވެ. ލެވަނޑޮސްކީގެ ގޯލަށް 7 މިނަޓު ފަހުން މެޗުގެ 41 ވަނަ މިނަޓުގައި ބާސާއަށް ލީޑު ފުުޅާ ކޮށްދިނީ މެމްފިސް ޑިޕޭ އެވެ. މެޗުގައި ބާސާއިން ޖެެހި ތިންވަނަ ގޯލުވެސް އެ ޓީމަށް މެޗުގެ ދެވަނަ ހާފުގައި ކާމިޔާބު ކޮށްދިނީ ލެވަނޑޮސްކީއެވެ.
އިންޓަނޭޝަނަލް ބްރޭކަށްފަހު ބާސާއިން ލީގުގައި ދެން ނިކުންނާނީ މަލޯލާ އާއި ދެކޮޅަށެވެ.
Advertisement
This content is created and paid for by advertisers and does not involve Voice Journalists
