ފައިސާ ޚަރަދުވާ މިންވަރު ކުޑަކުރުމުގެ ގޮތުން ށ. އަތޮޅު ކައުންސިލުން ކުރަންޖެހޭ ރަސްމީ ދަތުރުތައް ރާއްޖެ ޓްރާންސްޕޯޓް ލިންކް (އާރުޓީއެލް) ފެރީ މެދުވެރިކޮށް ކުރަން ނިންމައިފިއެވެ.

ދައުލަތުގެ މާލިއްޔަތަށް ލުއި ހޯދައިދިނުމުގެ ގޮތުން އެ ކައުންސިލުގެ ދަތުރުތައް ކުރަން ނިންމާފައިވަނީ މިދިޔަ ބުރާސްފަތި ދުވަހު ބޭއްވި އެކައުންސިލް ބައްދަލުވުމުގައެވެ.

ށ.އަތޮޅު ކައުންސިލުން ވިދާޅުވާ ގޮތުގައި އެކައުންސިލް މެންބަރުންގެ އިއްތިފާގުން މިގޮތަށް ނިންމީ ދައުލަތުގެ މާލިއްޔަތަށް ލުއި ހޯދައިދީ، ރައްޔިތުންގެ ފައިސާ ޚަރަދުވާ މިންވަރުކުޑަކުކޮށް، އަދި ރަށްތަކުގައި ހިންގާ ތަރައްގީގެ ހަރަކާތްތަކަށް ބާކީ ކުރެވޭ ފައިސާއިން އެހީތެރިކަން ފޯރުކޮށް ދިނުމުގެ ބޭނުމުގައި ކަމަށެވެ.

Advertisement

އެގޮތުން އެކައުންސިލުން ކުރަންޖެހޭ ހުރިހާ ދަތުރުތަކެއްވެސް އާރްޓީއެލް ފެރީ މެދުވެރިކޮށް ކުރަން ނިންމާފައިވާ ކަމަށްވެސް އެކައުންސިލުން ވިދާޅުވެއެވެ.

ށ. އަތޮޅު ކައުންސިލުން އެ ކައުންސިލުގެ ރަސްމީ ދަތުރުތައް އާރްޓީއެލް ފެރީ މެދުވެރިކޮށް ކުރަން ނިންމާފައިވާއިރު، ސަރުކާރުން ވަނީ، ރާއްޖޭގެ އެންމެ އުތުރުން ބޮޑު ތިލަދުންމަތީގައި ހިމެނޭ ހއ.، ހދ. އަދި ށ. އަތޮޅުގައި އާރުޓީއެލްގެ ޚިދުމަތް ފަށާފައެވެ.