ބޭރު ފައިސާގެ ރިޒާވް ހިފެހެއްޓޭނީ ޑޮލަރެއްގެ އަގު 17ރ. އަށް ބޮޑުކޮށްގެން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، އައްޑޫއަށް ކުރައްވަމުން ގެންދަވާ ދަތުރުފުޅުގެ ތެރެއިން، ރޭ މަރަދޫގައި އޮތް އެމްޑީޕީ ބައްދަލުވުމެއްގައި ވާހަކަދައްކަވަމުންނެވެ.
ރައީސް ނަޝީދު ވިދާޅުވީ، ރާއްޖޭގައި ބޭރު ފައިސާގެ ރިޒާވް އޮތީ ކަންބޮޑުވާންޖެހޭ މިންވަރެއްގައި ކަމަށާއި، ޑޮލަރު ވިއްކާ އަގު ރަސްމީ ސިފައެއްގައި ބޮޑު ނުކޮށް އޮތަސް ހަގީގީ އަގުގައި ޑޮލަރު ލިބޭނެ ގޮތެއް ނެތް ކަމަށެވެ.
އަދި ރާއްޖޭގައި ޑޮލަރުގެ ހަގީގީ އަގަކީ 17 ރުފިޔާ ކަމަށްވާއިރު، އެއީ މާކުރީން ސުރެ ފެންނަން އޮތް ހަގީގަތެއް ކަމަށާއި އެހެން ކަމުން ބޭންކުތަކުން ވެސް ޑޮލަރު ވިއްކާ އަގު 17 ރުފިޔާއަށް ހަދައިފިނަމަ ހައްލު ލިބޭނެ ކަމަށް ނަޝީދު ވިދާޅުވި އެވެ.
އެހެން ނަމަވެސް އެ ބަދަލާއި ފިނޭންސް މިނިސްޓަރާއި ގަވަރުނަރު ދެކޮޅު ހައްދަވާ ކަމަށް ރައީސް ނަޝީދު ވިދާޅުވިއެވެ. އަދި މިއީ އެފަދަ ބަދަލެއް ގެންނަން އެންމެ ރަނގަޅު ދަނޑިވަޅު ނޫން ކަމަށް ވިދާޅުވެފައިވާކަން ނަޝީދު ފާހަގަކުރެއްވި އެވެ.
Advertisement
This content is created and paid for by advertisers and does not involve Voice Journalists
