ރައީސުލްޖުމްހުރިއްޔާ އިބްރާހިމް މުހައްމަދު ޞާލިހްގެ ދެކަނބަލުން ރާނީ އެލިޒަބަތު ދެވަނައަށް ފަހުގެ އިހުތިރާމު އަދާކުރައްވައިފިއެވެ. 

މި މަހުގެ 8 ވަނަ ދުވަހު އުމުރުފުޅުން 96 އަހަރުގައި ރާނީ އެލިޒަބަތު އަވަހާރަވެފައިވަނީ ސްކޮޓްލޭންޑުގެ ބަލްމޯރަލް ކާސަލްގައި އެކަމަނާގެ ސިއްހީ ހާލަތު ގޯސްވުމުގެ ސަބަބުން ފަރުވާދެމުން ދަނިކޮށެވެ. އަވަހާރަވިއިރު އަރިހުގައި މިހާރު ތަހުތާއި ހަވާލުވެލައްވާފައިވާ ދޮށީ ދަރިކަލުން ރަސްގެފާނު ޗާލްސް އަދި ޝާހީ އާއިލާގެ މެންބަރުން ތިއްބެވިއެވެ.

ރާނީ އެލިޒަބަތުގެ ޖަނަޒާގައި ބައިވެރިވެވަޑައިގަތުމަށް ރައީސްގެ ދެކަނބަލުން އިނގިރޭސިވިލާތުގެ ލަންޑަނަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު އެ ދެކަނބަލުން ވަނީ ރާނީއަށް ފަހުގެ އިހުތިރާމް އަދާކުރެއްވުމުގެ ކުރިން ލަންޑަންގެ ލެންކެސްޓާ ހައުސްގައި ހުޅުވާފައިވާ ތަޢުޒިޔާގެ ދަފްތަރުގައި ތަޢުޒިޔާގެ ދެ މެސެޖު ލިއުއްވާފައެވެ. 

ރައީސް ޞާލިހް ލިޔުއްވި މެސެޖުގައި ވަނީ މުޅި ދުނިޔެ ރާނީ އަވަހާރަ ވުމުގެ ހިތާމާގައި ބައިވެރިވަމުންދާ މި ދަނޑިވަޅުގައި އެކަމަނާއަށް ފަހުގެ އިހުތިރާމް އަދާކުރުމުގެ ފުރުސަތު އެމަނިކުފާނަށް ލިބުމަކީ ވަރަށްބޮޑު ޝަރަފެއް ކަމުގައެވެ. މީގެ އިތުރުން އިނގިރޭސިވިލާތުގެ މިހާރުގެ ރަސްގެފާނު، ރަސްގެފާނު ޗާރލްސް ތިންވަނަ އަށާއި، އިނގިރޭސި ޝާހީ ޢާއިލާއަށާއި، އިނގިރޭސިވިލާތާއި އަދި ކޮމަންވެލްތް ޤައުމުތަކުގެ ރައްޔިތުންނަށްވެސް ރައީސްގެ ދެކަނބަލުން ވަނީ އިޚްލާޞްތެރިކަމާއެކު ތަޢުޒިޔާ ވިދާޅުވެފައެވެ.

ރާނީ އެލިޒަބަތުގެ ޖަނާޒާ ބޭއްވުމަށް ހަމަޖެހިފައިވަނީ މާދަމާ ލަންޑަނުގެ ވެސްޓްމިންސްޓާ އަބޭގައި މިއަދު ރާއްޖެ ގަޑިން މެންދުރުފަހު 3:00 ގައެވެ.